नगर: महाराष्ट्रातील सगळ्यात मोठी आणि मानाची एकांकिका स्पर्धा म्हणून ओळखली जाणारी ‘अहिल्यानगर महाकरंडक २०२५’ (Ahilyanagar Mahakarandak 2025) ही एकांकिका स्पर्धा येत्या १६ ते १९ जानेवारी या कालावधीत सकाळी १० ते रात्री १० यावेळेत अहिल्यानगर येथील माऊली सभागृहात (Mauli Sabhagruh)संपन्न होत आहे. यावेळी अहिल्यानगर महाकरंडक येथे शिवकालीन पुरातन नाणी, शिवकालीन शस्त्र आणि वस्तू यांचे प्रदर्शन देखील असणार आहे. यानिमित्ताने रंगकर्मींना आणि स्पर्धेला भेट देणाऱ्यांना छत्रपती शिवाजी महाराजांच्या काळातील दुर्मिळ वस्तू पाहायला मिळणार आहेत.
नक्की वाचा : ‘संतोष देशमुखांच्या मारेकऱ्यांना घरात लपवणाऱ्यांचाही हिशोब होणार’-बजरंग सोनवणे
दिग्दर्शक प्रवीण तरडे असणार स्पर्धेचे परीक्षक (Mahakarandak 2025)
या स्पर्धेच्या उद्‌घाटनाला आणि नटराज पूजनाला स्पर्धेचे यावर्षीचे परीक्षक अभिनेता आणि दिग्दर्शक प्रवीण तरडे, निर्माता आणि दिग्दर्शक आशिष वाघ, दिग्दर्शक आणि एडिटर मयूर हरदास हे उपस्थित राहणार आहेत. तसेच अहिल्यानगर महाकरंडक स्पर्धेचे अध्यक्ष नरेंद्र फिरोदिया, स्पर्धेचे संयोजक स्वप्नील मुनोत, महावीर प्रतिष्ठानचे अध्यक्ष हर्षल बोरा हे देखील उपस्थित असतील. स्पर्धेत प्रथम येणाऱ्या संघास ₹ १,५१,१११/- रुपये रोख, अहिल्यानगर महाकरंडक आणि प्रमाणपत्र असे पारितोषिक मिळणार आहे. तसेच विक्रमी रकमेची सांघिक आणि वैयक्तिक बक्षिसे देखील असणार आहेत. महाराष्ट्रातील एकांकिकांसाठी इतक्या मोठ्या रकमेची आकर्षक पारितोषिके देणाऱ्या निवडक स्पर्धांमधील प्रमुख स्पर्धा म्हणून ‘अहिल्यानगर महाकरंडक’ स्पर्धेने स्वतःचा नावलौकिक गेल्या दशकभरात कमावला आहे.
अवश्य वाचा : ‘स ला ते स ला ना ते’चित्रपटाच्या टीजरचे नितीन गडकरी यांच्या हस्ते प्रकाशन
‘अहिल्यानगर महाकरंडक’ उद्यापासून सुरु (Mahakarandak 2025)
गेल्या ११ वर्षांपासून ‘अहमदनगर महाकरंडक’ नावाने प्रसिद्ध असणारी ही स्पर्धा जिल्ह्याचे नाव ‘अहिल्यानगर’ असे बदलल्याने आता ‘अहिल्यानगर महाकरंडक’ नावाने ओळखली जाणार आहे. मागील एका तपात या स्पर्धेने राज्यातील सर्वात मोठी मानाची एकांकिका स्पर्धा म्हणून नाट्य वर्तुळात ओळख निर्माण केली आहे. छत्रपती शिवाजी महाराज यांच्या राज्याभिषेकाला ३५१ वर्षे पूर्ण झाल्या निमित्त या एकांकिका स्पर्धेचं यंदाचं ‘उत्सव रंगभूमीचा, सोहळा शिवराज्याभिषेकाचा’ हे ब्रीदवाक्य आहे. या स्पर्धेचा रंगमंच गाजवण्यासाठी राज्यभरातील कलावंत जोरदार तयारी करत असतात.दरवर्षीप्रमाणे अत्यंत जल्लोषात आणि उत्साहात यंदाची स्पर्धा रंगेल असा विश्वास ‘अहिल्यानगर महाकरंडक’ समितीचे अध्यक्ष नरेंद्र फिरोदिया यांनी दिला. एकांकिकांना स्पर्धेच्या माध्यमातून आर्थिक स्वरूपातील दमदार बक्षीस देऊन महाराष्ट्रातील नाट्य चळवळीला पाठबळ देण्याची भरीव कामगिरी नरेंद्र फिरोदिया हे गेले दशकभर सातत्याने करत आहेत.
अनुष्का मोशन पिक्चर्स अ‍ॅण्ड एंटरटेन्मेंट, शांतीकुमारजी फिरोदिया मेमोरियल फाउंडेशन प्रायोजित, श्री महावीर प्रतिष्ठान आयोजित व आय लव्ह नगरच्या संयुक्त विद्यमाने ही स्पर्धा होणार आहे. लेट्सअप हे या स्पर्धेचे डिजिटल पार्टनर आहेत. रंगकर्मींच्या अभिनय कौशल्याने सजलेल्या ‘अहिल्यानगर महाकरंडक’ एकांकिका स्पर्धा २०२५ या महाराष्ट्रातील सर्वात मोठ्या एकांकिका स्पर्धेला झी युवा या वाहिनीची साथ मिळाली आहे. झी युवा ही वाहिनी प्रायोजक म्हणून ‘अहिल्यानगर महाकरंडक’ २०२५ स्पर्धेत आपली भूमिका बजावत आहे.