Ahilyanagar Municipal Election : नगर : महापालिकेची सार्वत्रिक निवडणूक (Ahilyanagar Municipal Election) पार पडली आहे. त्यातून ६८ नगरसेवक (Corporator) महापालिकेच्या सभागृहात दिसणार आहेत. तसेच, महासभेकडून ६ स्वीकृत सदस्यही निवडले जाणार आहेत. यापूर्वी महापालिकेतील स्वीकृत सदस्यांची संख्या ५ होती. मात्र, सन २०२३ मध्ये महाराष्ट्र महानगरपालिका अधिनियमात करण्यात आलेल्या नव्या तरतुदीमुळे स्वीकृत सदस्य संख्या एकने वाढली असल्याची माहिती आयुक्त यशवंत डांगे (Yashwant Dange) यांनी दिली. दरम्यान, महापौर पदासाठी अद्याप राज्य शासनाकडून आरक्षण निश्चिती करण्यात आलेली नसल्याचेही त्यांनी स्पष्ट केले.
नक्की वाचा: अहिल्यानगरमध्ये विखे-जगताप मैत्रीचा मोठा विजय; महाविकास आघाडीचे पानीपत
एकूण सदस्य संख्येच्या १० टक्के स्वीकृत सदस्य
सार्वत्रिक निवडणुकीनंतर स्वीकृत सदस्यांची निवड केली जाते. महाराष्ट्र शासनाने राजपत्र प्रसिद्ध करून अधिनियमात तरतूद केली आहे. या नवीन तरतुदीनुसार एकूण सदस्य संख्येच्या १० टक्के किंवा जास्तीत जास्त १० स्वीकृत सदस्य यापैकी जी संख्या कमी असेल, ती गृहीत धरता येते. महापालिकेत ६८ सदस्य असल्यामुळे १० टक्के म्हणजे ६.८ संख्या येते. त्यामुळे आता सभागृहात ६ स्वीकृत सदस्य असणार आहेत.
हे देखील वाचा: महायुतीत लहान-मोठा भाऊ कोण? गुगली प्रश्नावर विखेंचं उत्तर
महापौर पदासाची आरक्षण सोडत बाकी (Ahilyanagar Municipal Election)
महापौर पदासाठी अद्याप आरक्षण सोडत काढण्यात आलेली नाही. आरक्षण निश्चितीनंतर आधी महापौर व उपमहापौर पदासाठी निवडणूक होईल. त्यानंतर स्थायी समिती सभापती, महिला बालकल्याण समिती सभापती व उपसभापती, सभागृह नेता, विरोधी पक्ष नेता या निवडी केल्या जाणार आहेत. स्वीकृत सदस्य निवडही महापौर निवडणुकीनंतरच होणार असल्याचे डांगे यांनी सांगितले.
