Anti-Corruption Bureau : नगर : नेवासा तालुक्यातील शीवरस्त्याच्या मोजणीसाठी तक्रादारांकडून दीड लाखांची लाच घेताना भूमिअभिलेख कार्यालयातील (Land Records Office) भूकरमापक अधिकारी लाचलुचपत प्रतिबंधक विभागाच्या (Anti-Corruption Bureau) पथकाने जेरबंद केला आहे. अजयभानसिंग गुलाबसिंग परदेशी यांच्यावर लाच (Bribery) स्वीकारल्याचा गुन्हा दाखल करण्यात आला आहे.
नक्की वाचा : टीईटी सक्ती रद्द करा; शिक्षक संघटनांचा जिल्हाधिकारी कार्यालयावर मोर्चा
पूर्ववत मोजणी करून देण्यासाठी मागितली लाच
तक्रारदार यांच्या भावाने व इतर शेतकऱ्यांनी पाथरवाला-गोयगव्हाण शिवारातील शेतीत जाण्यासाठीच्या शीव रस्त्यावरील अतिक्रमण हटविण्यासाठी नेवासा तहसीलदारांकडे अर्ज केला होता. न्यायालयाने अर्जदारांकडून कोणताही खर्च न घेता शासनाने मोजणी करावी, असे आदेश दिले होते. त्यानुसार फेब्रुवारी २०२३ मध्ये शिवरस्ता खुला करण्यात आला. यानंतर गट क्र. ३० तसेच पाथरवाल्यातील काही शेतकऱ्यांनी पुन्हा मोजणीसाठी अर्ज दाखल करून फी भरली. ६ जून २०२५ रोजी मोजणी अधिकारी जयदीप गाढे यांनी मोजणी केली, मात्र खुणा रस्त्याच्या मधोमध दाखवल्याने शीव रस्ता वापरासाठी बंद झाला. त्यावर तक्रारदार यांच्या भावाने ३० जून २०२५ रोजी भूमी अभिलेख कार्यालय, नेवासा येथे तक्रार अर्ज केला. मात्र, भुकरमापक अजयभानसिंग परदेशी यांनी पूर्ववत मोजणी करून देण्यासाठी तसेच भुकरमापक जयदीप गाढे यांच्यासाठी वैयक्तीक प्रभाव वापरून स्वतःचा आर्थिक फायदा करून घेण्याच्या हेतूने बेकायदेशीर मार्गाने लाच मागितल्याचे तक्रारीत दाखल केली.
अवश्य वाचा : गावठी कट्टा बाळगणारे दोघे जेरबंद; कोतवाली पोलिसांची कारवाई
पंचासमक्ष स्विकारली रक्कम (Anti-Corruption Bureau)
परदेशी यांनी तक्रारदाराकडे ३ डिसेंबरला १ लाख ५० हजार रुपयांची लाच मागितली होती. लाचलुचपत प्रतिबंधक विभागाच्या पथकाने गुरुवारी (ता. ४) पंचासमक्ष सापळा रचला असता, परदेशी यांनी मागितलेली रक्कम स्विकारली आणि त्याचक्षणी त्यांना रंगेहाथ पकडण्यात आले. त्यांच्या विरोधात नेवासा पोलीस ठाण्यात गुन्हा दाखल करण्यात आला आहे. ही कारवाई सापळा अधिकारी नाशिकचे पोलीस निरीक्षक राहुलकुमार नाईक, अंमलदार प्रफुल्ल माळी, विलास निकम, विनोद पवार, तापसी अधिकारी राजू आल्हाट यांच्या पथकाने केली.
