Ban on Nylon and Chinese Manja : नगर : आगामी मकर संक्रांतीच्या (Makar Sankranti) सणाचे औचित्य साधून व त्या अनुषंगाने होणारे संभाव्य अपघात टाळण्यासाठी अहिल्यानगर जिल्हा प्रशासनाने (Ahilyanagar District Administration) महत्त्वाचा निर्णय घेतला आहे. जिल्ह्यात नायलॉन व चायनीज मांजाच्या (Ban on Nylon and Chinese Manja) खरेदी – विक्रीसह, साठवणूक व वापरावर १७ जानेवारी २०२६ पर्यंत संपूर्ण बंदी घालण्यात आली आहे, असे आदेश अपर जिल्हादंडाधिकारी दादासाहेब गिते यांनी जारी केले आहेत.

नक्की वाचा : जगातील पहिली सापाचं विष शोधणारी किट विकसित; डॉ. शाम भट यांच्या प्रयत्नांना यश

दुचाकीस्वार, लहान मुले अडकून जखमी होण्याची शक्यता

मुंबई उच्च न्यायालयाच्या छत्रपती संभाजीनगर खंडपीठाने सुमोटो याचिका मध्ये नायलॉन मांजामुळे होणारी जीवितहानी टाळण्यासाठी मांजावर बंदी घालण्याचे निर्देश दिले आहेत. याच निर्देशांचे पालन करत आणि पोलीस अधीक्षक, अहिल्यानगर यांच्या प्रस्तावानुसार जिल्हा प्रशासनाने हे पाऊल उचलले आहे. मकर संक्रांतीच्या काळात मोठ्या प्रमाणावर पतंग उडवले जातात, मात्र, काही व्यापारी नायलॉन व चायनीज धाग्याची विक्री करतात. हा मांजा अत्यंत धारदार असल्याने पतंग उडविणाऱ्यांच्या हाताला इजा होण्याची, तसेच तुटलेला मांजा रस्त्यावर पडल्यास दुचाकीस्वार, पादचारी आणि लहान मुले अडकून गंभीर जखमी होण्याची दाट शक्यता असते.

अवश्य वाचा : मोठी बातमी!अण्णा हजारे पुन्हा उपोषणाला बसणार

पशू-पक्ष्यांच्या जीविताला या मांजामुळे धोका (Ban on Nylon and Chinese Manja)

याशिवाय, हा मांजा विद्युत वाहिन्यांवर पडल्यास शॉर्टसर्किट होऊन आग लागण्याच्या आणि मालमत्तेचे नुकसान होण्याच्या घटना घडतात. विशेषतः पशू-पक्ष्यांच्या जीविताला या मांजामुळे मोठा धोका निर्माण होऊन पर्यावरणाची हानी होत असल्याचे प्रशासनाच्या निदर्शनास आले आहे. या गंभीर बाबींची दखल घेत प्रशासनाने १७ जानेवारी २०२६ या कालावधीसाठी कडक निर्बंध लागू केले आहेत. या आदेशानुसार, अहिल्यानगर शहर व जिल्ह्यात नायलॉन व चायनीज मांजाची निर्मिती, विक्री, साठवणूक आणि वापर करण्यास सक्त मनाई करण्यात आली आहे. या आदेशाचे उल्लंघन करणाऱ्या व्यक्तीवर कठोर कायदेशीर कारवाई करण्यात येईल, असेही गिते यांनी म्हटले आहे.