Deepa Parab : अनेक मराठमोळ्या कलाकारांनी हिंदी सिनेसृष्टीत आपल्या कर्तृत्वाचा ठसा उमटवला आहे. यात अनेक मराठी अभिनेत्री आघाडीवर आहेत. या अभिनेत्रींच्या यादीत असलेल्या दीपा परब (Deepa Parab) हिने सहज सुंदर अभिनयाच्या बळावर नेहमीच रसिकांचे लक्ष वेधले आहे. आता दीपा पुन्हा एकदा हिंदी चित्रपटात (Hindi Movie) झळकणार आहे. ‘फकिरीयत’ (Fakiriyat Movie) या आगामी हिंदी सिनेमात दीपा मुख्य भूमिकेत दिसणार आहे. संतोष मांजरेकर (Santosh Manjarekar) यांनी या सिनेमाचे दिग्दर्शन केले आहे. लवकरच हा चित्रपट प्रदर्शित होणार आहे.
नक्की वाचा : ‘आळंदीमध्ये कत्तलखाना होऊ देणार नाही’ – देवेंद्र फडणवीस
दिग्दर्शक संतोष मांजरेकर यांचा पहिलाच हिंदी सिनेमा (Deepa Parab)
भद्रबाहू डिव्हाइन क्रिएशन्स एलएलपी च्या बॅनरखाली ‘फकिरीयत’ या सिनेमाची निर्मिती करण्यात आली आहे. आजवर मराठी सिनेमांचे यशस्वी दिग्दर्शन करणाऱ्या दिग्दर्शक संतोष मांजरेकर यांनी प्रथमच हिंदी सिनेमाचे दिग्दर्शन केले आहे. ‘फकिरीयत’ हा त्यांचा स्वतंत्रपणे दिग्दर्शित केलेला पहिला हिंदी सिनेमा आहे. कोणतीही व्यक्तिरेखा अगदी सहजपणे साकारण्याची कला अंगी असलेल्या दीपा परबने यापूर्वी हिंदी सिनेमात काम केले होते. एका प्रदीर्घ ब्रेकनंतर ती पुन्हा हिंदी भाषिक रसिकांसमोर येणार आहे. दीपाने बऱ्याच मराठी सिनेमांमध्ये विविधांगी भूमिका साकारल्या आहेत.
अवश्य वाचा : मोठी बातमी! महाबळेश्वर, पाचगणी पर्यटकांसाठी २ महिने बंद
‘फकिरीयत’ चित्रपटात नेमकं काय ?(Deepa Parab)
‘फकिरीयत’ मध्ये रसिकांना तिच्या अभिनयाचे वेगळे पैलू पाहायला मिळणार आहेत. हा चित्रपट एक युगपुरुष, महापुरुष, महावतार बाबाजी व त्यांचा क्रियायोग यांची खरी ओळख सांगणारा आहे. बाबाजींच्या एका शिष्येच्या माध्यमातून या सिनेमाची कथा उलगडत जाणार आहे. जी आपले जीवन गुरु इच्छेने जगते, गुरुकार्य जीवनाचे ध्येय समजते, तिला होणारी दैवी दर्शने, येणारे आदेश, होणारा विरोध, तिचा संघर्ष अशा अनेक अद्भुत, अविश्वनीय, रहस्यमय घटना म्हणजे फकिरीयत चित्रपट आहे. या सिनेमात दीपा परब, विनीत शर्मा, संतोष जुवेकर, उदय टिकेकर, अक्षय वर्तक, नयन जाधव, संदेश जाधव, अनिशा सबनीस आदी कलाकार झळकणार आहेत
‘चिरुट जलती है’ आणि ‘अध्यात्म एक विद्रोह, एक क्रांती’ या अनुजा जानवलेकर लिखित पुस्तकांवर आधारित कथा असलेल्या या चित्रपटाचे पटकथालेखन अनिल पवार यांनी केले आहे. संवादलेखन अनिल पवार आणि अनुजा जानवलेकर यांनी केले आहे. अजित रेड्डी यांनी सिनेमॅटोग्राफी केली असून संकलन निलेश गावंड यांनी केले आहे. समृद्धी पवार यांनी लिहिलेली गीते संगीतकार प्रवीण कुंवर यांनी मनीष राजगिरे, मनोज मिश्रा, जसराज जोशी, नेहा राजपाल यांच्या आवाजात संगीतबद्ध केली आहेत.