नगर : फलटण उपजिल्हा रुग्णालयातील डॉक्टर तरुणीने केलेल्या आत्महत्येचं (Phaltan Suicide news) प्रकरण हे देशभर गाजले आहे. आता या तरुणीचा मृत्यू हा गळा दाबून झालेला नाही. तर तिने गळफास घेतल्यामुळेच तिचा मृत्यू झाल्याचे फॉरेन्सिक रिपोर्टमधून निष्पन्न झाल्याचे स्पष्टीकरण मुख्यमंत्री देवेंद्र फडणवीस (Devendra Fadnavis) यांनी दिले. ते मंगळवारी विधानसभेतील (Vidhansabha) चर्चेदरम्यान बोलत होते.
नक्की वाचा: एक गाव एक पाणवठ्याचा राखणदार गेला;कोण होते बाबा आढाव?
देवेंद्र फडणवीस नेमकं काय म्हणाले ? (Devendra Fadnavis on Phaltan Sucide)
देवेंद्र फडणवीस यांनी फलटणमधील डॉक्टर तरुणीच्या आत्महत्या प्रकरणाविषयी सविस्तर भाष्य केले. फॉरेन्सिक रिपोर्टमध्ये दोन गोष्टी स्पष्ट झाल्या आहेत. एक म्हणजे या तरुणीच्या हातावर जो मजकूर लिहला होता, ते हस्ताक्षर तिचेच आहे. दुसरी गोष्ट म्हणजे या तरुणीचा मृत्यू फास घेतल्यामुळेच झाला आहे, असे देवेंद्र फडणवीस यांनी सांगितले. याप्रकरणाचा तपास अजून संपलेला नाही. मात्र, आता या प्रकरणात आरोपपत्र दाखल केले जाईल,असं फडणवीस यांनी सांगितले.
अवश्य वाचा: सक्षम ताटे हत्या प्रकरणात मोठा खुलासा,मामिडवार कुटुंबाची धर्मांतराची ऑफर
ही तरुणी फलटण उपजिल्हा रुग्णालयात मेडिकल ऑफिसर होती. एखाद्या आरोपीला अटक करताना तो अटकेसाठी फिट आहे की नाही, यासाठी वैद्यकीय अहवाल घ्यावा लागतो. या डॉक्टर तरुणीने काही आरोपी अनफिट असल्याचे रिपोर्ट दिले होते. त्यामुळे पोलिसांनी तिच्या वरिष्ठांना पत्र लिहले होते. यामध्ये त्यांनी सांगितले होते की, संबंधित आरोपी हे मोठ्या गुन्ह्यात पकडण्यात आले आहेत. त्यांना अनफिट प्रमाणपत्र दिले जात आहे. याची चौकशीही झाली. हे सर्व पाच महिने आधी घडले होते. त्यामुळे पोलिसांच्या दबावाचा आणि आत्महत्येचा संबंध नाही, असे देवेंद्र फडणवीस यांनी स्पष्ट केले.
नेमकं काय घडलं ? (Devendra Fadnavis on Phaltan Sucide)
फलटण येथील डॉक्टर तरुणीने केलेल्या आत्महत्या प्रकरणातील आरोपी पोलीस अधिकारी गोपाळ बदने याने तरुणीची फसवणूक करुन तिचे शारीरिक शोषण केले. मोबाईलमधील चॅटसमधून ही गोष्ट समोर आली आहे. गोपाळ बदने याने तरुणीला लग्नाचे आमिष दाखवले होते. पण नंतर त्याने वेगळी भूमिका घेतली. त्यामुळे तरुणीने सुसाईड नोटमध्ये गोपाळ बदने आणि आणखी एका तरुणाचे नाव लिहले होते. एकीकडे बदने तिची फसवणूक करुन तिचे शारीरिक शोषण करत होता. तर दुसरीकडे दुसऱ्या तरुणानेही परिस्थितीचा फायदा घेऊन डॉक्टर तरुणीची फसवणूक केली. त्यामुळे तिने या दोघांची नावं लिहून आत्महत्या केली.
