Dharmarakshak Ahilyadevi Holkar Movie: आजवर बऱ्याच दैवी शक्तींनी धर्माचे रक्षण आणि अधर्माचे निर्दलन करण्यासाठी भूतलावर अवतार घेतले आहेत. सतराव्या शतकातील ‘महाराणी अहिल्यादेवी होळकर’ (Ahilyadevi Holkar) या त्यापैकीच एक आहेत. याच थोर महाराणींची यशोगाथा ‘धर्मरक्षक अहिल्यादेवी होळकर – एक युग’ (Dharmarakshak Ahilyadevi Holkar) या आगामी चित्रपटात पाहायला मिळणार आहे. या चित्रपटाचा लक्षवेधी ट्रेलर (Realese Trailer) नुकताच प्रदर्शित करण्यात आला आहे.
नक्की वाचा : दहावीचा निकाल जाहीर;महाराष्ट्रात मुलींनीच मारली बाजी
२३ मे रोजी चित्रपट प्रदर्शित होणार (Dharmarakshak Ahilyadevi Holkar Movie)
निर्माते सोमनाथ शिंदे यांनी लयभारी प्रोडक्शनच्या बॅनरखाली तयार केलेल्या ‘धर्मरक्षक अहिल्यादेवी होळकर’ चित्रपटाची प्रस्तुती नितीन धवणे फिल्म्स यांनी केली आहे. नितीन धवणे पाटील या चित्रपटाचे सहनिर्माते तसेच प्रस्तुतकर्ते आहेत. वीर पराक्रमी महिला योद्ध्याची अद्भुत यशोगाथा दाखवण्यासाठी रसिकांना सतराव्या शतकात नेणाऱ्या सुशांत सोनवले यांनी या चित्रपटाचे लेखन व दिग्दर्शन केले आहे. हा चित्रपट २३ मे रोजी संपूर्ण महाराष्ट्रभर प्रदर्शित होणार आहे.
अवश्य वाचा : पंतप्रधान नरेंद्र मोदी पोहोचले आदमपूर एअरबेसवर; जवानांशी साधला संवाद
ट्रेलरमध्ये नेमकं काय ?(Dharmarakshak Ahilyadevi Holkar Movie)
पूर्वीच्या काळी स्वातंत्र्य, रणधुमाळी आणि रणसंग्रामाचा विचार म्हणजे काय? याची अचूक व्याख्या सांगत ‘धर्मरक्षक अहिल्यादेवी होळकर’ चित्रपटाचा ट्रेलर सुरू होतो. युद्धाची धुमश्चक्री सुरू असते आणि एक मराठा मावळा प्राणपणाने लढत असल्याचे दिसते. ‘धनगराची लेक एक दिवस मराठा साम्राज्याचा भगवा सातासमुद्रापार फडकवेल’, असे म्हणत लहानग्या अहिल्यादेवींची एन्ट्री होते. छत्रपती शिवाजी महाराजांनी रायरेश्वरावर घेतलेल्या शपतेप्रमाणे अहिल्यादेवी एक शपथ घेतात आणि गनिमावर तुटून पडतात. गनिमाला मराठ्यांच्या तलवारीची धार दाखवणाऱ्या जिगरबाज महाराणीची चित्तथरारक गाथा ‘धर्मरक्षक अहिल्यादेवी होळकर’ चित्रपटात पाहायला मिळणार असल्याचे संकेत देणारा ट्रेलर चित्रपटाबाबत उत्कंठा वाढवणारा आहे.
कधी चित्रपट, तर कधी मालिकांमध्ये वेगवेगळ्या व्यक्तिरेखा साकारणारी रसिकांच्या परिचयाची असलेली अभिनेत्री अश्विनी महांगडे या चित्रपटात अहिल्यादेवींच्या भूमिकेत आहे. तिच्या जोडीला मराठी सिनेविश्वातील मातब्बर कलाकार आहेत. यात राहुल राजे, सुहास जाधव, संदेश कदम, सुरेश विश्वकर्मा, अनिल नगरकर, संजय खापरे, सुनील गोडसे, संजीवनी जाधव, शिवा रिंदानी आदी कलाकारांचा समावेश आहे.
गीतकार गुरू ठाकूर आणि प्रियांका शेंडगे यांनी लिहिलेली गीते संगीतकार शुभम पाटणकर यांनी नंदेश उमप आणि सागर भोसले यांच्या पहाडी आवाजात संगीतबद्ध केली आहेत. या चित्रपटातील नंदेशच्या आवाजातील पोवाडा रसिकांच्या अंगावर रोमांच आणणारा ठरेल. विनोद राजे यांनी डीआय, ओम पाटील यांनी संकलन, तर सलमान मुलानी आणि सुनीत व्यास यांनी व्हिएफएक्स केले आहेत. या चित्रपटाचे कार्यकारी निर्माते दादा शिंदे व धनाजी शिंदे आहेत.