Dinkar Pawara : अकोले : शाळा व मैदान हा आदिवासी विकास विभागाचा (Department of Tribal Development) या वर्षाचा मानस आहे. नाशिक आदिवासी विकास विभागाच्या आश्रमशाळेतील विद्यार्थ्यांनी क्रीडा प्रबोधनीमध्ये प्रशिक्षणासाठी सहभाग घ्यावा व क्रीडा नैपुण्य वाढवावे. आता राष्ट्रीय स्तरावरचे प्राविण्य मिळवलेले क्रीडा शिक्षक पुढील महिन्यात सर्व शाळांसाठी नाशिक विभागात नियुक्त करत आहोत. त्यामुळे विद्यार्थ्यांनी शिक्षण व खेळ याचा समन्वय साधावा, असे आवाहन आदिवासी विकास अपर आयुक्त दिनकर पावरा (Dinkar Pawara) यांनी केले. शैक्षणिक संकुल मवेशी (ता.अकोले) येथे तीन दिवसीय प्रकल्पस्तरीय क्रीडा स्पर्धा (Sports Competition) पार पडल्या. या स्पर्धेचे व शैक्षणिक साहित्य प्रदर्शनाचे पारितोषिक वितरण नुकतेच पार पडले, यावेळी ते बोलत होते.
अवश्य वाचा: काँग्रेस जिल्हाध्यक्ष सचिन गुजर यांच्यावर गुन्हा दाखल; छत्रपती शिवाजी महाराजांचा अवमान केल्याचा आरोप
पुढे बोलताना पावरा म्हणाले,
जे विद्यार्थी विभागीय स्तरासाठी पात्र ठरले आहेत, त्यांना शुभेच्छा दिल्या व विभागीय क्रीडा स्पर्धेच्या अनुषंगाने मार्गदर्शकांनी विद्यार्थ्यांकडून सराव करून घ्यावा असे आवाहन केले. जिल्हा क्रीडा अधिकारी ज्ञानेश्‍वर खुरंगे म्हणाले, प्रत्येक खेळाडूने जर आवडीचा छंद जोपासला, सातत्याने सराव केला तर त्या माध्यमातून करिअर करण्याची एक नवीन संधी आपल्याला उपलब्ध होणार आहे. जे खेळाडू राज्यस्तरावरील स्पर्धेमध्ये सहभागी होतात, पदक मिळवतात, अशा खेळाडूंसाठी महाराष्ट्र शासनाने 5 टक्के जागा शासकीय आणि निमशासकीय सेवेत ठेवलेल्या आहेत. या आरक्षणाचा फायदा घेऊन कित्येक विद्यार्थी आज पोलीस किंवा शासनाच्या वेगवेगळ्या विभागांमध्ये वर्ग तीन पदावर काम करत आहेत. सर्व खेळाडूंनी विशिष्ट उंचीपर्यंत पोहोचायचं असेल तर खेळाचा सातत्याने सराव केला पाहिजे असे आवाहन त्यांनी केले.
नक्की वाचा : एआयने बनवलेले व्हिडिओ नेमके कसे ओळखायचे? जाणून घ्या…
स्पर्धेत 1023 विद्यार्थ्यांनी घेतला सहभाग (Dinkar Pawara)
या स्पर्धेत कबड्डी, खो-खो, व्हॉलीबॉल, हॅन्डबॉल, वैयक्तीक क्रीडा प्रकार लांब उडी, उंच उडी, धावणे, गोळाफेक, भालाफेक, थाळीफेक वय 14, 17 व 19 वर्ष वयोगटात झाल्या असून 489 मुले तर 543 मुली असे एकूण 1023 विद्यार्थ्यांनी सहभाग घेतला. विज्ञान प्रदर्शनात 36 शाळांतील 114 व विद्यार्थी व शिक्षकांनी सहभाग घेतला. तर कला प्रदर्शनात 23 शाळांतील 87 विद्यार्थी व शिक्षकांनी सहभाग घेतला. शासकीय आश्रमशाळा अकलापूर केंद्राला यावर्षी जनरल चॅम्पियनशीप मान्यवरांच्या हस्ते प्रदान करण्यात आली. प्रास्ताविक व स्वागत प्रकल्प अधिकारी देवकन्या बोकडे यांनी केले. सूत्रसंचालन नवनाथ गायकवाड, मुकुंद सुर्यवंशी यांनी केले होते तर आभार सहायक प्रकल्प अधिकारी शिक्षण दीपक कालेकर यांनी मानले. यावेळी सुनील मोरे, संजय सोनवणे, श्याम कांबळे, मुख्याध्यापक संघाचे अध्यक्ष शिवराज कदम, उपाध्यक्ष आदिनाथ सुतार, पंडित कदम, कमलाकर हंडीबाग, संशोधन अधिकारी शंतनू डांगे, गंगाराम करवर आदी उपस्थित होते.
