E-Bus : नगर : केंद्र सरकारच्या (Central Government) शहरी विकास मंत्रालयामार्फत देशभरात पीएम ई-बस सेवा योजनेची अंमलबजावणी सुरू करण्यात आली. केंद्र शासनाने जाहिर ई निविदेद्वारे, बसेस पुरविण्यासाठी नवी दिल्लीतील एका कंपनीची निवड केलेली आहे. या योजनेत देशातील १६९ शहरांचा समावेश करण्यात आला आहे. अहिल्यानगर शहरासाठी ४० ई-बसेस (E-Bus) उपलब्ध होणार आहेत. त्यासाठी महापालिका केडगाव येथे चार्जिंग स्टेशन (Charging Station) उभारत आहे. महावितरणकडून चार्जिंग स्टेशनच्या प्रस्तावित जागेपर्यंत वीज पुरवठा उपलब्ध करण्याचे काम सुरू आहे. पहिल्या टप्प्यात दहा बसेस उपलब्ध होणार असल्याची माहिती आयुक्त तथा प्रशासक यशवंत डांगे (Yashwant Dange) यांनी दिली.
नक्की वाचा : सुपा एमआयडीसीतील टायर कंपनीला आग
पीएम ई-बस सेवा योजनेतुन मिळणार बस
पीएम ई-बस सेवा योजनेसाठी केंद्र सरकारने १६ ऑगस्ट २०२३ रोजी २० हजार कोटी रुपयांचा निधी मंजूर केला आहे. त्यातून १६९ शहरांना तब्बल १० हजार ई-बसेस उपलब्ध करून दिल्या जाणार आहेत. २० ते ४० लाख लोकसंख्येच्या शहरात प्रत्येकी १५०, १० ते २० लाख व ५ ते १० लाख लोकसंख्येच्या शहरात प्रत्येकी १०० व ५ लाखांच्या आतील लोकसंख्येच्या शहरात प्रत्येकी ५० पर्यंत ई-बसेस उपलब्ध करून दिल्या जाणार आहेत. नगर शहराला गरजेनुसार ३५ सीटच्या ४० बसेस उपलब्ध होणार आहेत. केंद्र शासनाने बस उपलब्ध करून देण्यासाठी नवी दिल्ली येथील कंपनीला काम दिले आहे.
अवश्य वाचा : राज्यात पुढील तीन दिवस अवकाळी पाऊस;हवामान विभागाचा अंदाज
विजेचा पुरवठा करणारी उच्चदाब वाहिनीचे काम सुरू (E-Bus)
चार्जिंग स्टेशनसाठी महापालिकेने केडगाव येथील अडीच एकर जागा निश्चित केली आहे. तेथे वीज भार मंजूर झालेला आहे. सोनेवाडी सबस्टेशनपासून महापालिकेच्या सबस्टेशन पर्यंत विजेचा पुरवठा करणारी उच्चदाब वाहिनी टाकण्याचे काम महावितरणमार्फत सुरू आहे. या कामाचा खर्च केंद्र सरकार करणार आहे. हा १.९७ कोटी रुपयांचा निधी थेट महावितरणकडे वर्ग झाला आहे. तसेच, चार्जिंग स्टेशन उभारणीसाठी ९.०६ कोटी रुपये मंजूर असून त्याचे कामही सुरू झाले आहे. कामाला गती देण्याच्या सूचना दिल्या असून, लवकरच हे कामही पूर्ण होईल, असे आयुक्त यशवंत डांगे यांनी सांगितले.