नगर : काही दिवसांपूर्वी एव्हरेस्ट एंटरटेनमेंट प्रस्तुत आणि वेटक्लाऊड प्रोडक्शन निर्मित ‘गुलकंद’ (Gulkand Movie) मधील ‘चंचल‘ (Chanchal Song) हे प्रेमगीत प्रेक्षकांच्या भेटीला आलं होतं. ‘चंचल’ या गाण्याला मिळालेल्या प्रेक्षकांच्या पसंती नंतर आता या चित्रपटातील दुसरं गाणं ‘चल जाऊ डेटवर’(Chal Jau Datevar) प्रेक्षकांच्या भेटीला आलं आहे. गमतीदार अंदाजातील या गाण्याचे बोल, संगीत प्रेक्षकांना नक्कीच भावेल. हे गाणं ऐकायला जितकं छान आहे, तितकंच त्याचं सादरीकरणही अप्रतिम आहे. वैशाली सामंत आणि अवधूत गुप्ते यांच्या कमाल आवाजातील या गाण्याला प्रशांत मडपूवार यांच्या शब्दांची व अविनाश विश्वजीत यांच्या जबरदस्त संगीताची जोड लाभली आहे.
नक्की वाचा : धक्कादायक! महाराष्ट्रीयन तरुणीची बंगळुरूत हत्या;सुटकेसमध्ये आढळला मृतदेह
१ मे २०२५ ला गुलकंद होणार प्रदर्शित (Gulkand Movie)
गाण्यात सई आणि समीरची भन्नाट केमिस्ट्री दिसत आहे. यातील समीर आणि सईचे नृत्य एक सरप्राईज आहे. सई समीरची ही ढवळे फॅमिली कुठे आणि कशी डेटवर जाणार आणि तिथे काय धमाल होणार, याची उकल १ मे २०२५ ला गुलकंद प्रदर्शित झाल्यावर होणार आहे. सचिन मोटे लिखित आणि सचिन गोस्वामी दिग्दर्शित या चित्रपटात सई ताम्हणकर, समीर चौघुले, ईशा डे, प्रसाद ओक, वनिता खरात, मंदार मांडवकर, जुई भागवत, तेजस राऊत, शार्विल आगटे यांसारखे तगडे कलाकार आहेत. सचिन गोस्वामी, सचिन मोटे आणि संजय छाब्रिया यांनी चित्रपटाची निर्मिती केली आहे.
अवश्य वाचा : ‘छत्रपती शिवाजी महाराज सर्वधर्म समावेशक होते’;अजित पवारांनी खोडला संभाजी भिडेंचा दावा
दिग्दर्शक सचिन गोस्वामी काय म्हणाले… (Gulkand Movie)
दिग्दर्शक व निर्माते सचिन गोस्वामी म्हणतात, ‘या गाण्यातील सई, समीर आणि प्रसाद, ईशा यांची केमिस्ट्री मजेशीर असून प्रेक्षकांना हसवणारी आहे. गाण्याचे बोल, संगीत सगळंच खूप छान आहे. एक वेगळाच मूड बनवणारं हे गाणं असल्यानं त्याचं चित्रीकरण तसंच होणं गरजेचं होतं. मस्त कलरफुल ठिकाणी चित्रित करण्यात आलेलं हे गाणं संगीतप्रेमींना नक्कीच आवडेल. गाण्यात सई -समीर जरी डेटवर जात असल्याचे दिसत असले तरी १ मे रोजी सर्वांनी आपल्या कुटुंबियांसह ही डेट एन्जॉय करावी,”असं त्यांनी सांगितले आहे.