New Movie : मराठी चित्रपट सृष्टीतील एक अनोखा आणि वेगळा विचार घेऊन प्रेक्षकांच्या मनात स्थान मिळवणारा अभिनेता,दिग्दर्शक पुष्कर जोग(Director Pushkar Jog) पुन्हा एकदा एका अनोख्या विषयावर भाष्य करणारा चित्रपट प्रेक्षकांसाठी घेऊन येत आहे. त्याच्या आगामी चित्रपटाचे नाव ‘हार्दिक शुभेच्छा,पण त्याचं काय?’ (Hardik Shubhechha Pn tyach kay) आहे. नुकतेच या चित्रपटाचे मोशन पोस्टर प्रदर्शित (Poster Release) झाले आहे.
नक्की वाचा : अंकुश चौधरी प्रथमच झळकणार पोलीस अधिकाऱ्याच्या भूमिकेत!
लैंगिक सुसंगतता या विषयावर भाष्य करणारा हा चित्रपट आहे. चित्रपटाच्या प्रदर्शित झालेल्या पोस्टरवर एक नवविवाहित दाम्पत्य पाहायला मिळत आहे.ही कथा प्रेक्षकांना नातेसंबंधातील एका महत्वाच्या पैलूशी जोडून ठेवेल.यात पुष्कर जोग, हेमल इंगळे, पूर्वी मुंदडा, विशाखा सुभेदार,अभिजीत चव्हाण,अनुष्का सरकटे, पृथ्विक प्रताप, विजय पाटकर, भरत सावळे आणि किशोरी अंबिये यांच्या प्रमुख भूमिका आहेत.
पॅरिसमध्ये चित्रित होणारा पहिला मराठी चित्रपट (New Movie)
पुष्कर जोग याच्या आधीच्या चित्रपटाप्रमाणे, या चित्रपटातही नात्यातील गुंतागुंत, भावनिक संघर्ष आणि जीवनातील काही कंगोरे मांडण्यात आले आहेत. पुष्करचे चित्रपट प्रेक्षकांना नेहमीच विचार करायला भाग पाडणारे असतात आणि हा चित्रपटही त्या परंपरेतून तयार झाला आहे. या चित्रपटाचे चित्रीकरण दुबईसह ॲमस्टरडॅम आणि पॅरिसमध्ये झाले असून खासियत म्हणजे ॲमस्टरडॅम आणि पॅरिस मध्ये चित्रित होणारा हा पहिला मराठी चित्रपट आहे.
अवश्य वाचा : “मराठी माणूस कलहशील”;मुख्यमंत्री देवेंद्र फडणवीस यांचं वक्तव्य
दिग्दर्शक पुष्कर जोग नेमकं काय म्हणाला ? (New Movie)
दिग्दर्शक पुष्कर जोग म्हणतात, “आजच्या आधुनिक काळातही लैंगिक सुसंगतता हा विषय अनेकदा दुर्लक्षित केला जातो.नातेसंबंधांना फक्त भावनिक किंवा मानसिक बळ पुरेसं नसतं, तर शारीरिक सुसंगतता देखील तेवढीच महत्त्वाची आहे. या चित्रपटाच्या माध्यमातून आम्ही हा विषय एका सहज पद्धतीने प्रेक्षकांपर्यंत पोहोचवण्याचा प्रयत्न केला आहे.”
आनंद पंडित मोशन पिक्चर्स प्रस्तुत, गुझबम्प्स एंटरटेनमेंट यांच्या सहयोगाने ‘हार्दिक शुभेच्छा पण त्याचं काय?’ हा चित्रपट येत्या २१ मार्च २०२५ ला प्रेक्षकांच्या भेटीला येणार आहे. या चित्रपटाचे दिग्दर्शन व लेखन पुष्कर जोग यांनी केले असून आनंद पंडित, रुपा पंडित आणि पुष्कर जोग निर्माते आहेत. तर या चित्रपटाचे सहलेखन नमिष चापेकर यांनी केले आहे. पॅनोरमा स्टुडिओजने या चित्रपटाच्या वितरणाची धुरा सांभाळली आहे.