केडगावमधील जिजाऊ महोत्सवास नगरकरांचा उत्स्फूर्त प्रतिसाद
IPS Tejaswi Satpute : नगर : राजमाता जिजाऊ (Rajmata Jijau) यांनी दोन छत्रपती घडवले. त्यांच्या शिकवणीमुळे चारित्र्यसंपन्न आणि नितीवान लोककल्याणकारी राजा शिवबा घडला. महात्मा ज्योतिराव फुले, छत्रपती शाहू महाराज, क्रांतिज्योती सावित्रीबाई फुले, डॉ. बाबासाहेब आंबेडकर (Dr. Babasaheb Ambedkar), स्वामी विवेकानंद (Swami Vivekananda) आदी महापुरुषांनी सामाजिक समता प्रस्थापित करण्यासाठी महत्वाचे योगदान दिले. सामाजिक समतेसाठी, अशा महापुरुषांनी विचार पेरले. त्याचीच पूर्तता करण्यासाठी म्हणून आपल्याला सगळ्यांना त्यांच्या विचारांचा वारसा पुढे न्यायचा आहे. मात्र, सध्याचा समाज प्रत्येक महापुरुषाचे जातीच्या आधारावर मूल्यमापन करून महापुरुषांचा अवमान करणार नाही, याकडे आपण लक्ष द्यावे. तसेच महापुरुषांची ओळख त्यांच्यासारखे दिसून नाही, तर त्यांच्या कार्यातून व्हावी आणि यातून सुज्ञ व सजग नागरिक घडतील यासाठी प्रयत्न करत राहावे लागणार आहे, असे प्रतिपादन आयपीएस अधिकारी तेजस्वी सातपुते यांनी व्यक्त केले.
नक्की वाचा : लव्ह जिहाद, धर्मांतर व लँड जिहाद रोखण्यासाठी नाथ जागृती यात्रा : योगी बालकनाथ महाराज
कार्यक्रमाच्या अध्यक्षस्थानी पद्मश्री पोपटराव पवार
राजमाता जिजाऊ आणि स्वामी विवेकानंद यांच्या जयंतीदिनानिमित्ताने राष्ट्रीय युवा दिनाच्या कार्यक्रमानिमित्त आयोजित जिजाऊ महोत्सव या कार्यक्रमात त्या बोलत होत्या. कार्यक्रमाच्या अध्यक्षस्थानी पद्मश्री पोपटराव पवार होते. तर, लेखक देवा झिंजाड, नितीन थोरात, वास्तूविशारद राजशेखर कुलकर्णी, ज्ञानदेव पांडुळे, विनोद सिंग परदेशी, जालिंदर बोरुडे आदि यावेळी उपस्थित होते. जिजाऊ महोत्सवाचे स्वागताध्यक्ष किसन सातपुते, लेखक सचिन मोहन चोभे, अशोक झरेकर, डॉ. योगेश पवार, गणेश सातपुते आदींनी कार्यक्रम यशस्वी होण्यासाठी प्रयत्न केले. पद्मश्री पोपट पवार म्हणाले की, ‘जिजाऊंनी दुष्काळाची परिस्थिती अनुभल्याने पुढील काळात दुष्काळ निवारणासाठी शिवाजी महाराजांच्याकरवी गड किल्ल्यांवर तलाव बांधले. त्याकाळी वनसंवर्धन आणि जलसंवर्धन करण्याचे काम केले. तरुणांनी आपल्या परिस्थितीचा न्यूनगंड न बाळगता, प्रामाणिकपणे कष्ट केल्यास यश निश्चित मिळते.’ संवेदनशील मनाचे लेखक देवा झिंजाड यांनी आई विषयक कवितांचे सादरीकरण करून उपस्थितांच्या मनाचा ठाव घेतला. त्यांनी समाजातील वास्तवावर परखड भाष्य करून उपस्थितांची दाद मिळवली. तर, सिध्दहस्त लेखक नितीन थोरात यांनी त्यांच्या व्यक्तिगत आयुष्यातील चढ उतारांच्या प्रेरणादायी कहाण्या सांगितल्या.
अवश्य वाचा : अखेर धनंजय देशमुख यांचं आंदोलन मागे!
यशोदा लंके यांना जिजाऊ आदर्श माता पुरस्कार प्रदान (IPS Tejaswi Satpute)
कार्यक्रमा दरम्यान बायोमी टेक्नॉलॉजीचे सीईओ डॉ. प्रफुल्ल गाडगे यांना युवा उद्योजक, कर्जत येथील कवियित्री स्वाती पाटील यांना युवा कवियित्री; तर श्रीमती यशोदा लंके यांना जिजाऊ आदर्श माता पुरस्कार प्रदान करून सन्मानित करण्यात आले. या आयोजन समितीचे अध्यक्ष अॅड. संतोष गायकवाड यांनी कार्यक्रमाचे प्रास्ताविक, तर आभार प्रदर्शन कार्याध्यक्ष महादेव गवळी यांनी केले. निवेदक उद्धव काळापहाड यांच्या निवेदन कौशल्य, समयसूचकता आणि वैचारिक बैठक आदी गुणांचे मान्यवरांनी विशेष कौतुक केले.