Leopard Attack : नगर : अहिल्यानगर शहराजवळ तपोवन रोडवर असलेल्या कराळे मळ्यात बिबट्याची तीन पिल्ले (Leopard Cubs) सापडल्याची घटना ताजी असताना आज (ता. २७) रोजी पहाटे बोल्हेगाव (Bolhegaon) परिसरात मेंढपाळाच्या कळपावर बिबट्याने हल्ला (Leopard Attack) करत एक मेंढी ठार मारली तर एक बोकड घेऊन तो पसार झाल्याची घटना समोर आली आहे. या घटनेमुळे नागरिकांमध्ये भीतीचे वातावरण पसरले आहे.
अवश्य वाचा: काँग्रेसचे जिल्हाध्यक्ष सचिन गुजर यांचे अपहरण करून बेदम मारहाण; श्रीरामपूर शहरात खळबळ
परिसरातील नागरिकांना काळजी घेण्याच्या सूचना
बोल्हेगाव परिसरात संपत विठ्ठल वाकळे यांच्या शेतात बंडू किसन तांबे (रा. ढवळपुरी, ता. पारनेर) हा मेंढपाळ त्यांचा मेंढ्यांचा कळप घेऊन आलेला होता. पहाटे ४ च्या सुमारास या कळपावर अचानक बिबट्याने हल्ला चढवला. या हल्ल्यात एका मेंढीच्या गळ्याला चावा घेतल्याने तिचा जागेवर मृत्यू झाला तर कळपातील एक बोकड बिबट्याने फरपटत नेला. मेंढपाळाच्या समोरच ही घटना घडली. या घटनेची माहिती वनविभागाला देण्यात आली. वनपरिक्षेत्र अधिकारी अविनाश तेलोरे यांच्या मार्गदर्शनाखाली वनपाल नितीन गायकवाड व वनरक्षक विजय चेमटे यांनी घटनास्थळी जावून मयत मेंढीचा पंचनामा केला. हा हल्ला बिबट्यानेच केला असल्याचे त्यांनी सांगत परिसरातील नागरिकांनी याबाबत काळजी घेण्याच्या सूचना दिल्या आहेत.
नक्की वाचा : डिजिटल अरेस्ट ऑनलाईन फसवणूक प्रकरणात तिघे जेरबंद
नागरिकांमध्ये भीतीचे वातावरण (Leopard Attack)
शहर परिसरात गेल्या ३-४ दिवसातील बिबट्याच्या वावराची ही दुसरी घटना आहे. तपोवन रोडवरील कराळे मळ्यात २५ नोव्हेंबर ला दुपारी बिबट्याची तीन पिल्ले आढळली होती. त्याला पकडण्यासाठी वनविभागाने पिंजरा लावला मात्र, बिबट्याने रात्रभर पिंजऱ्याभोवती घिरट्या घालून हुलकावणी दिली होती. त्यानंतर आता बोल्हेगाव परिसरात बिबट्याने एका मेंढीवर व बोकडावर हल्ला केल्याने नागरिकांमध्ये भीतीचे वातावरण पसरले आहे.
