नगर : समाजाने जबरदस्तीने लादलेल्या परंपरेचा एका कुटुंबावर होणारा परिणाम या आशयसूत्रावर बेतलेला “परंपरा” हा चित्रपट लवकरच प्रेक्षकांच्या भेटीला येत आहे. या चित्रपटाचा ट्रेलर लाँच (Trailer Launch) करण्यात आला असून, उत्तम अभिनय, श्रवणीय संगीत,आशयघन कथानक असलेल्या या चित्रपटाविषयी या ट्रेलरने उत्सुकता निर्माण केली आहे.
नक्की वाचा : केएल राहुल, डी कॉक पडले भारी; लखनौचा चेन्नईवर ८ गडी राखून दणदणीत विजय
स्टार गेट मूव्हीज या निर्मिती संस्थेअंतर्गत ‘परंपरा’ चित्रपटाची निर्मिती (Parampara Movie)
हरीश कुमार आणि अँड्र्यू रिबेलो यांच्या स्टार गेट मूव्हीज या निर्मिती संस्थेअंतर्गत ‘परंपरा’ या चित्रपटाची निर्मिती करण्यात आली आहे. फैजल पोपरे हे या चित्रपटाचे सहनिर्माते आहेत. तर दिग्दर्शन प्रणय निशाकांत तेलंग यांचे आहे. अभिनेते मिलिंद शिंदे आणि अभिनेत्री वीणा जामकर यांच्यासह प्रकाश धोत्रे, अरुण कदम, नम्रता पावसकर, किशोर रावराणे, जयराज नायर, रोहित चव्हाण, प्रशांत नेमण, भूषण घाडी, मास्टर मच्छिंद्र, दिवंगत अभिनेते जनार्दन परब यांचा दमदार अभिनय हे या चित्रपटाचं वैशिष्ट्य आहे.
अवश्य वाचा : इस्रायलचा इराणवर हल्ला;क्षेपणास्त्र डागल्याचा दावा
“परंपरा” एक समृद्ध सिनेमॅटिक अनुभव (Parampara Movie)
प्रतिकूल परिस्थितीतही परंपरेच्या जपणुकीवर लक्ष केंद्रित करणारा हा चित्रपट आहे. महाराष्ट्रातील सांस्कृतिक वारसा जिथे खूप महत्त्वाचा आहे. प्रेक्षकांच्या मनात खोलवर परिणाम करणारे कथानक या चित्रपटात मांडण्यात आलं आहे. चित्रपटाची पटकथा प्रणय निशाकांत तेलंग आणि संजय सावंत यांची असून छायाचित्र निशा तेलंग यांनी केले आहे. मंगेश कांगणे यांनी लिहिलेल्या गीतांना आनंद मेनन यांचे मधुर संगीत लाभले आहे.
श्रीकांत तेलंग यांनी संकलक म्हणून काम पाहिले आहे तर पार्श्वसंगीत विजय गवंडे यांचे आहे. “परंपरा” एक समृद्ध सिनेमॅटिक अनुभव देण्यास तयार आहे. एकंदरीत ‘परंपरा’ हा चित्रपट केवळ मनोरंजनच नाही, तर आजच्या बदलत्या जगात वारसा आणि परंपरेचे महत्त्व दर्शवणारा आहे. त्याशिवाय ग्रामीण भागातील शेतकरी कुटुंबाचं जगणं, सामाजिक ताण याचे दर्शनही हा चित्रपट घडवतो. अनेक आंतरराष्ट्रीय महोत्सवात गौरवलेला हा चित्रपट प्रेक्षकांना नक्कीच अंतर्मुख करेल यात शंका नाही. २६ एप्रिलला हा चित्रपट प्रेक्षकांच्या भेटीला येत आहे.