Robbery : कर्जत : कर्जत कृषी उत्पन्न बाजार समितीच्या व्यापाऱ्यांवर शनिवारी (ता.१८) सकाळी दोन अज्ञात व्यक्तींपैकी एकाने रक्कम लुटीच्या (Robbery) हिशोबाने मिरचीची पूड अंगावर टाकत तसेच रिव्हॉल्व्हर (Revolver) दाखवत हल्ला केला. मात्र, व्यापाऱ्यांच्या प्रसंगावधानाने स्वत:चा जीव यासह सोबत असलेली रक्कम देखील वाचली. घटनास्थळी कर्जत पोलीस (Police) प्रशासनाने भेट देत पुढील तपास सुरू केला आहे.

अवश्य वाचा : सेवाव्रताची भूमिका कायम राहील : डॉ. सुजय विखे

दीड लाख रुपये असलेली बॅग हिसकावण्याची झटपट

कृषी उत्पन्न बाजार समितीचे व्यापारी रामराजे प्रफुल्ल नेवसे शनिवारी सकाळी ९ वाजता नेहमीप्रमाणे आपल्या बुलेटवर भांडेवाडीकडून कर्जत कृषी उत्पन्न बाजार समितीच्या आवारात आले. यावेळी डोक्यात टोपी घातलेला व चेहऱ्यास पांढऱ्या रुमालाने झाकलेला मध्यम बांध्याचा इसम बुलेटच्या पुढे येत त्याने रामराजे नेवसे यांच्या डोळ्यावर त्याच्या हातातील मिरची पूड फेकली. मात्र नेवसे यांनी चेहरा बाजूला केल्याने ती मिरची पूड शर्टवर पडली. बुलेटवरून नेवसे उतरत असताना त्या अज्ञात इसमाने त्यांच्या हातातील दीड लाख रुपये रोख रक्कम असलेली बॅग हिसकावण्याची झटपट केली. तर त्याचा दुसरा साथीदार हा त्याच्या ताब्यात असलेली मोटारसायकल चालू करून पळून जाण्याच्या स्थितीत बसलेला होता. रक्कम असलेली बॅग हिसकावणाऱ्याने नेवसे यांना हाता-बुक्क्यांनी मारहाण करीत पायावर त्याचा पाय मारला. यावेळी नेवसे यांच्या मोठ्याने ओरडण्याचा आवाज आल्याने शेजारील आडत दुकानाचे दिवाणजी सुरज बरबडे धावत आल्याचे पाहताच हिसकावणारा अज्ञात इसमाने मोटारसायकलकडे धावला. यावेळी त्याच्या कमरेला असलेले पिस्टल खाली पडले. पडलेले पिस्टल उचलण्यासाठी तो माघारी फिरला असता नेवसे यांनी ते उचलले, हे पाहताच तो पुन्हा मोटारसायकलवर बसला आणि दोघे अज्ञात व्यक्ती राशीनच्या दिशेने पळून गेले.

नक्की वाचा : नाराजीनाट्यानंतर छगन भुजबळ शिर्डीत दाखल

दोन अज्ञात इसमावर गुन्हा दाखल (Robbery)

व्यापारी रामराजे नेवसे यांच्या फिर्यादीवरून दोन अज्ञात इसमावर गुन्हा दाखल करण्यात आला. सकाळी घडलेल्या या घटनेने बाजार समितीमध्ये भीतीचे वातावरण निर्माण झाले होते. घटनास्थळी पोलीस उपअधीक्षक विवेकानंद वाखारे, पोलीस उपनिरीक्षक रमीज मुलाणी यांनी भेट दिली.