Rupali Thombare Patil: महाराष्ट्रातील प्रसिद्ध कीर्तनकार इंदुरीकर महाराज (Indurikar Maharaj) यांच्या मुलीचा साखरपुडा काही दिवसांपूर्वी मोठ्या थाटामाटात पार पडला. या सोहळ्याचे फोटो आणि व्हिडिओ सोशल मीडियावर प्रचंड व्हायरल झाले. त्यानंतर इंदुरीकर महाराजांवर मोठ्या प्रमाणात टीका करण्यात आली. अखेर इंदुरीकर महाराज यांनी एका कीर्तनात या संपूर्ण प्रकरणाबद्दल खंत व्यक्त करत कीर्तन सोडण्याचा निर्णय जाहीर केला. यासंबंधीचा त्यांचा एक व्हिडिओ सध्या सोशल मीडियावर मोठ्या प्रमाणात व्हायरल होत आहे. यावर आता राष्ट्रवादी अजित पवार गटाच्या नेत्या रुपाली ठोंबरे पाटील (Rupali Thombare Patil) यांनी आपली प्रतिक्रिया दिली आहे.
नक्की वाचा: आम्ही माणूस आहोत,कुठे चुकलो तर साधू संतांनी आम्हाला सांगा;नाशिकमध्ये मुख्यमंत्र्यांचं आवाहन
‘महाराज तुम्ही फेटा खाली उतरवायचा नाही’ – रुपाली ठोंबरे (Rupali Thombare Patil)
रुपाली ठोंबरे पाटील यांनी फेसबुकवर पोस्ट करत म्हटले आहे की, ‘इंदुरीकर महाराज राम कृष्ण हरी. तुम्ही फेटा खाली उतरवायचा नाही. महाराज तुम्ही सोशल मीडियाच्या विकृत लोकांमुळे व्यथित झालात, साहजिकच होणार. पण आपण आपल्या कर्तृत्वाने आपल्या, कामाने सिद्ध आहात. या सोशल मीडियाचे विकृत छपरी जे माणूस नावावर कलंक आहेत, यांच्याकडे अजिबात लक्ष देऊ नये. आपण आपल्या वारकरी प्रबोधनातून, किर्तन आणि भजनातून समाजातील माता, भगिनी, बंधूंसाठी अत्यंत मौल्यवान कार्य केलं आहे. अध्यात्मिक शांती देत आहात. तेही या युगाशी समतोल साधून केलं आहे. त्यामुळे आपण अजिबात व्यथित होऊ नका,असे त्यांनी म्हटले आहे.
अवश्य वाचा: अभिमानास्पद! माढ्याचे चार सुपुत्र एकाचवेळी झाले उपजिल्हाधिकारी
‘महाराज नसतील घर घरातील बिघडलेले स्त्री, पुरुष चांगल्या मार्गावर येणार नाही’ (Rupali Thombare Patil)
रुपाली ठोंबरे पाटील पुढे म्हणाल्या की, तुमच्यासारखे महाराज नसतील घर घरातील बिघडलेले स्त्री, पुरुष चांगल्या मार्गावर येणार नाहीत. त्यांना सदबुद्धी, चांगले विचार, चांगल्या कर्माचा रस्ता सांगणार कोण? तुम्ही फेटा खाली उतरवायचा नाही. तुमच्या सोबत अख्खा महाराष्ट्र आहे. तुमचे कुटुंब म्हणून तुमच्या कुटुंबातील मी लेक आहे. आमच्या भगिनींबद्दल कोण बोलत असेल तर त्या वेड्या, विकृत माणसावर तुम्ही दुर्लक्ष करा. त्यांची विकृती ठेचून काढू, अजिबात व्यथित होऊ नका आणि फेटा खाली ठेवायचा नाही. ही माझी आपणास लेक म्हणून विनंती आहे. फेटा खाली ठेवायचा नाही,’असे त्यांनी म्हटले आहे.
