Sharad Pawar : तामिळनाडूमध्ये (Tamilnadu) ७२ टक्के आरक्षण होऊ शकते,तर घटनेत बदल करता येऊ शकतो. घटनेत बदल करण्याची भूमिका घेतली तरच मराठा आरक्षणाचा(Maratha Reservation) प्रश्न सुटू शकतो, असं वक्तव्य ज्येष्ठ नेते शरद पवार (Sharad Pawar) यांनी अहिल्यानगरमध्ये (Ahilyanagar)केले आहे. माजी जिल्हा परिषद अध्यक्ष अरुण कडू यांच्या अमृतमहोत्सवी (75 वर्षे)वर्षानिमित्ताने नगर येथील सहकार सभागृहात आयोजित कार्यक्रमात ते बोलत होते. मनोज जरांगे पाटील यांच्या नेतृत्त्वाखाली मुंबईतील आझाद मैदानात मराठा आरक्षणाच्या मागणीसाठी आंदोलन होत असताना शरद पवार यांनी आरक्षणाबाबत हे महत्त्वपूर्ण भाष्य केले आहे.
या वेळी राष्ट्रवादी काँग्रेसचे प्रदेशाध्यक्ष आमदार शशिकांत शिंदे, काँग्रेसचे प्रदेशाध्यक्ष हर्षवर्धन सपकाळ, माजी मंत्री बाळासाहेब थोरात, माजी उपमुख्यमंत्री विजयसिंह मोहिते पाटील, आमदार खाजा निलेश लंके, आमदार मोनिका राजळे, आमदार सत्यजित तांबे, अरुण कडू यांच्यासह आजी-माजी आमदार व पदाधिकारी उपस्थित होते.
नक्की वाचा : मराठा आरक्षणासाठी फडणवीस संविधानात बदल का करत नाहीत? संजय राऊतांची विचारणा
केंद्राच्या पातळीवर धोरणात्मक निर्णय घेण्याची वेळ (Sharad Pawar)
शरद पवार यांनी मराठा आरक्षणाच्या बाजूने भूमिका घेतली आहे.त्यांनी म्हटले की, प्रगतीच्या रस्त्यावर जायचे असेल तर त्याला आरक्षणाच्या मार्गाने जावे लागेल असा एक विचार आहे. केंद्राच्या पातळीवर धोरणात्मक निर्णय घेण्याची वेळ आली आहे.शेतकऱ्यांच्या जमिनी दिवसेंदिवस कमी होत चालल्या आहेत. विकासाच्या नावाखाली शेतीच्या जमिनी कमी होत आहेत. तर शेतीवर अवलंबून असलेले घटक वाढत आहे. त्यामुळे तांत्रिक बाबींचा विचार करून शेती केली पाहिजे. शेतीत एआय वापर करायला हवा. रयत शिक्षण संस्थेने यासाठी प्रयत्न सुरू केले आहेत. या प्रयत्नांना जनतेने देखील सहकार्य करणे गरजेचे आहे, असे शरद पवार यांनी म्हटले.
अवश्य वाचा : सोनू सूद करणार स्टार प्लसच्या नवीन शो ‘संपूर्णा’चा ट्रेलर लॉन्च
‘अहिल्यानगरमध्ये आरएसएसची विचारधारा वाढत आहे’ (Sharad Pawar)
काँग्रेस हा मोठा पक्ष होता, जेव्हा या पक्षाचे दोन भाग झाले तेंव्हा त्यात समाजवादी विचार आणि साम्यवादी विचार होता. हे विचार सर्वाधिक अहिल्यानगर जिल्ह्यात पाहायला मिळाले. या जिल्ह्यातील स्वातंत्र्यचा लाभ तळागाळापर्यंत पोहचवण्याचा प्रयत्न केला.अहिल्यानगर जिल्ह्यात साम्यवादाचा विचार, गांधींचा विचार होता. मात्र,आता याच जिल्ह्यात भाजप, आरएसएसची विचारधारा वाढत आहे. याकडे दुर्लक्ष करून चालणार नाही,असा इशारा देखील शरद पवार यांनी दिला आहे.
पवार म्हणाले की, शाहू महाराजांनी शिक्षणासाठी मराठा समाजाला आरक्षणाची दारे खुली केली आणि त्यापासून आरक्षणाच्या प्रवासाची सुरुवात झाली. मात्र, काळाच्या ओघात विविध समाजघटकांकडून आरक्षणाच्या मागण्या वाढल्या असून मराठा-ओबीसी संघर्ष उभा ठाकला आहे. आजही आरक्षणाची आवश्यकता असल्याची वस्तुस्थिती आहे. परंतु सर्वोच्च न्यायालयाने घालून दिलेली ५० टक्क्यांची मर्यादा अडथळा ठरत आहे.
“शेतकरी व सैन्यात कार्यरत असलेल्या समाजघटकांसमोर हा प्रश्न गंभीरपणे उभा आहे. संसदेत जर याबाबत निर्णय घ्यायचा असेल, तर केंद्र सरकारची भूमिका पारदर्शक असली पाहिजे. तसे झाल्यास आरक्षणाचा प्रश्न निश्चित सुटेल,” असा ठाम विश्वास पवार यांनी व्यक्त केला.
