ADCC Bank : नगर : जिल्हा सहकारी बँकेच्या (ADCC Bank) रिक्त झालेल्या अध्यक्षपदीसाठी आज (ता.२४) निवड प्रक्रिया राबविण्यात आली. प्रक्रियेत माजी आमदार चंद्रशेखर घुले (Chandrashekhar Ghule) पाटील यांची बिनविरोध निवड करण्यात आली. सकाळी ११ वाजता जिल्हा उपनिबंधक (District Deputy Registrar) मंगेश सुरवसे यांच्या अध्यक्षतेखाली संचालक मंडळाची अधिकृत बैठक पार पडली. दरम्यान सकाळी ९ वाजता अहिल्यानगर येथील एका हॉटेल मध्ये संचालकांची अनौपचारिक बैठक झाल्याचे समजते. या बैठकीत अध्यक्षपदासाठी घुले यांच्या नावावर शिक्कामोर्तब झाले, त्यानंतर अधिकृत बैठकीत त्यांची निवड बिनविरोध पार पडली.
अवश्य वाचा : श्री क्षेत्र मोहटा देवी ट्रस्टच्या नूतन विश्वस्त मंडळाची घोषणा
मतदानाधिकार असलेल्या या सदस्यांचा समावेश
यावेळी मतदानाधिकार असलेल्या संचालकांमध्ये मोनिका राजळे, अण्णासाहेब म्हस्के, अंबादास पिसाळ, अमोल राळेभात, आशा तापकीर, भानुदास मुरकुटे, सीताराम गायकर, अरुण तनपुरे, चंद्रशेखर घुले, राहुल जगताप, आशुतोष काळे, प्रशांत गायकवाड, अनुराधा नागवडे, अमित भांगरे, गीतांजली शेळके, माधवराव कानवडे, करण ससाणे, गणपतराव सांगळे व शंकरराव गडाख या सदस्यांचा समावेश आहे.
नक्की वाचा : श्रीगोंद्यात महायुतीमध्ये फूट; नगराध्यक्ष पदासाठी चौरंगी लढत होणार
घुले यांनी संचालक मंडळाचे मानले आभार (ADCC Bank)
या निवडीनंतर मंत्री राधाकृष्ण विखे पाटील यांची पडद्यामागील भूमिका निर्णायक ठरल्याची राजकीय वर्तुळात चर्चा आहे. घुले हे कोपरगावचे आमदार आशुतोष काळे यांचे सासरे असल्याने, काळे–विखे यांच्यातील सध्याचे राजकीय समन्वय देखील या निवडीच्या पार्श्वभूमीवर महत्त्वाचा घटक ठरल्याचे मानले जात आहे. निवड प्रक्रियेपूर्वी अनेक संचालकांनी पुढील राजकीय समीकरणांच्या दृष्टीने विखे पाटील यांना सहकार्य राखणे आवश्यक असल्याने, घुले यांच्या समर्थनाचा कल स्पष्ट दिसत होता. बिनविरोध निवड झाल्यानंतर माजी आमदार चंद्रशेखर घुले पाटील यांनी विश्वास व्यक्त केल्याबद्दल संचालक मंडळाचे आभार मानले, तसेच राधाकृष्ण विखे पाटील यांनी केलेल्या सहकार्याबद्दल कृतज्ञता व्यक्त केली.
