Indian Volleyball Team : श्रीरामपूर : तालुक्यातील खंडाळा गावचे सुपुत्र आणि क्रीडा क्षेत्रातील बहुआयामी व्यक्तिमत्त्व असलेले गौरव अरविंद डेंगळे (Gaurav Arvind Dengle) यांनी आपल्या क्रीडा कार्याच्या जोरावर पुन्हा एकदा राज्याचा आणि जिल्ह्याचा मान उंचावला आहे. नुकतीच त्यांची भारतीय व्हॉलीबॉल संघाच्या (Indian Volleyball Team) निवड समिती सदस्यपदी नियुक्ती झाली आहे.
अवश्य वाचा: काँग्रेस जिल्हाध्यक्ष सचिन गुजर यांच्यावर गुन्हा दाखल; छत्रपती शिवाजी महाराजांचा अवमान केल्याचा आरोप
राज्यस्तरावर आपली उमटवली छाप
ही जबाबदारी त्यांना आगामी ६९ व्या राष्ट्रीय १७ वर्षाखालील मुला-मुलींच्या व्हॉलीबॉल स्पर्धेच्या निवड प्रक्रियेसाठी देण्यात आली आहे. या राष्ट्रीय स्पर्धेचे आयोजन उत्तर प्रदेशातील बरेली येथे करण्यात आले आहे. त्यांच्या या नियुक्तीमुळे केवळ खंडाळा गावच नव्हे, तर श्रीरामपूर तालुका आणि संपूर्ण महाराष्ट्र राज्याचा अभिमान वाढला आहे. गौरव डेंगळे हे लहानपणापासूनच क्रीडाप्रेमी असून, त्यांनी खेळाडू म्हणून जिल्हा, विभागीय आणि राज्यस्तरावर आपली छाप उमटवली. पुढे त्यांनी प्रशिक्षक, निवड चाचणी सदस्य व तांत्रिक अधिकारी म्हणून क्रीडा क्षेत्रात स्वतःस सिद्ध केले. त्यांनी गेली जवळपास दोन दशके ग्रामीण भागातील क्रीडा चळवळीला दिशा देत सातत्याने काम केले आहे. सध्या ते कोपरगाव येथील सोमैय्या विद्याविहार संचलित श्री शारदा इंग्लिश मिडीयम स्कूलमध्ये व्हॉलीबॉल प्रशिक्षक म्हणून कार्यरत असून, त्यांच्या प्रशिक्षणाखाली अनेक विद्यार्थ्यांनी राज्य व राष्ट्रीय पातळीवर उल्लेखनीय यश मिळवले आहे.
नक्की वाचा : एआयने बनवलेले व्हिडिओ नेमके कसे ओळखायचे? जाणून घ्या…
राज्यभरात स्वतंत्र ओळख निर्माण (Indian Volleyball Team)
खेळातली तांत्रिक समज, प्रशिक्षणातील शिस्त आणि खेळाडूंमध्ये सकारात्मकता निर्माण करण्याची क्षमता ही त्यांची वैशिष्ट्ये आहेत. २०१९ मध्ये पुणे येथे झालेल्या “खेलो इंडिया युथ गेम्स”मध्ये त्यांनी तांत्रिक अधिकारी म्हणून जबाबदारी पार पाडली, तर २०२३ मध्ये गोवा येथे झालेल्या ३७ व्या राष्ट्रीय क्रीडा स्पर्धेत त्यांनी गोवा नेटबॉल संघाचे संघ व्यवस्थापक म्हणून भूमिका बजावली. याशिवाय त्यांनी सावित्रीबाई फुले पुणे विद्यापीठाच्या मुलींच्या व्हॉलीबॉल संघाच्या निवड समिती सदस्य म्हणूनही योगदान दिले आहे. त्यांच्या या कामगिरीमुळे त्यांना राज्यभरात क्रीडा व प्रशासकीय क्षेत्रात स्वतंत्र ओळख निर्माण झाली आहे.
