Balasaheb Thorat : संगमनेर : सहकारी साखर कारखान्याच्या (Cooperative Sugar Factory) माध्यमातून सहकार चळवळ बळकट करण्याबरोबरच पीक कर्जाच्या माध्यमातून जिल्हा बँकेने शेतकरी उभा केला. 11 हजार कोटींच्या ठेवी हे जनतेच्या विश्वासाचे मोठे प्रतीक आहे. जिल्ह्याच्या विकासात मातृसंस्था म्हणून बँक कायम पाठीशी उभी राहिली आहे असे प्रतिपादन काँग्रेसच्या (Congress) राष्ट्रीय कमिटीचे सदस्य तथा माजी मंत्री बाळासाहेब थोरात (Balasaheb Thorat) यांनी काढले आहे. अहिल्यानगर जिल्हा सहकारी बँकेच्या (Ahilyanagar District Cooperative Bank) संगमनेर शाखेच्या तालुका विकास अधिकारी कार्यालयाच्या नूतनीकरण उद्घाटन समारंभ कार्यक्रमात ते बोलत होते. यावेळी अध्यक्षस्थानी जिल्हा बँकेचे चेअरमन चंद्रशेखर घुले (Chandrashekhar Ghule) हे होते तर व्यासपीठावर व्हा. चेअरमन ॲड माधवराव कानवडे, दुर्गाताई तांबे, रणजीतसिंह देशमुख, पांडुरंग पाटील घुले, बँकेचे संचालक गणपतराव सांगळे बाळासाहेब साळुंखे, शेती संघाचे चेअरमन संपतराव डोंगरे, आर बी राहणे, अजय फटांगरे, सुरेश थोरात, दीपक भोसले, ॲड नानासाहेब शिंदे, मुख्य कार्यकारी अधिकारी रावसाहेब वर्पे तालुका विकास अधिकारी अशोक थोरात कार्यालयीन अधीक्षक चेतन देशमुख यांच्यासह विविध पदाधिकारी उपस्थित होते.
अवश्य वाचा- ‘राहुल गांधींची खासदारकी रद्द करा’; भाजप खासदाराची लोकसभेत मागणी
सहकारात शिस्त आणि पारदर्शकता रुजवली
यावेळी सहकार महर्षी भाऊसाहेब थोरात सभागृह नूतनीकरण कामाचे उद्घाटन करण्यात आले. या प्रसंगी बोलताना माजी मंत्री बाळासाहेब थोरात म्हणाले की, जिल्हा सहकारी बँकेने जिल्ह्याच्या विकासात मोठे योगदान दिले आहे. जिल्ह्यातील विकासातून झालेल्या बदलाच्या पाठीशी जिल्हा बँक कायम मातृसंस्था म्हणून उभी राहिली आहे. या बँकेमध्ये सहकार महर्षी भाऊसाहेब थोरात यांनी 44 वर्ष संचालक म्हणून काम करताना व्हा चेअरमन व चेअरमन या पदावर 18 वर्ष काम केले. शिस्त पारदर्शकता सहकारात रुजवली. गाव पातळीवरील सेवा सोसायटी सक्षम करण्याबरोबर सचिवांबाबत भाऊसाहेब थोरात कायम काळजी करायचे. सचिवाबाबत त्यांची मोठी तळमळ असायची. संगमनेर शाखेच्या या इमारतीचे भूमिपूजन माझे आजोबा संतोजी थोरात यांच्या हस्ते 29 जुलै 1976 रोजी झाले. पन्नास वर्षाच्या या कार्यकालयामध्ये मोठा बदल झाला आहे. बँकेने शेतकऱ्यांचा मोठा विश्वास संपादन केला आहे. आणि त्यामुळे जिल्हा बँकेत 11000 कोटींच्या ठेवी आहेत.
नक्की वाचा- डोळ्यांनी अंध असली तरी ‘ती’ देणार डोळस न्याय!थान्या नाथन नेमक्या कोण ?
काळानुरूप बदल करावे लागणार (Balasaheb Thorat)
तर चंद्रशेखर घुले म्हणाले की, सहकार महर्षी भाऊसाहेब थोरात व स्वर्गीय मारुतराव घुले यांचा स्नेहबंध कायम राहिला. माजी मंत्री बाळासाहेब थोरात यांच्या मार्गदर्शनाखाली संगमनेर तालुक्याने कायम राज्याला दिशा दिली आहे. संगमनेरचे दिशादर्शक काम हे सर्वांसाठी प्रेरणादायी आहे. सहकाराची ही परंपरा आपण पुढे घेऊन जात आहोत. 75 वर्षांमध्ये बँकेने अत्यंत चांगले काम केले आहे. काळानुरूप बदल करावे लागणार आहेत. पीक कर्ज, शेती कर्ज, ऊस कर्ज यापुढे जाऊन अधिकाऱ्यांनी कार्पोरेट बँकिंग प्रणाली राबवण्यासाठी अधिक काम करावे. याचबरोबर बँकेने नव्याने 8 टक्के व्याजाने सोनेतारण कर्ज सुरू केले आहे. आगामी काळामध्ये जिल्ह्याच्या सर्व सोसायट्यांच्या माध्यमातून क्यूआर कोड राबवण्यात येणार असल्याचे ते म्हणाले.
हे वाचा : जिल्हास्तरीय शालेय क्रीडा स्पर्धेत सोनोशी शाळेला अजिंक्यपद
थोरात यांनी सहकार जपला
तर ॲड माधवराव कानवडे म्हणाले की, सहकार महर्षी भाऊसाहेब थोरात व त्यांच्या काळातील सर्व सहकारी अत्यंत दूरदृष्टीचे होते. सहकाराला त्यांनी दिशा दिली आणि त्याच वाटचालीवर आज बँकेचे कामकाज सुरू आहे. माजी मंत्री बाळासाहेब थोरात यांनी सहकार जपला. शेती ,शिक्षण, सहकार, ग्रामीण विकास, दूध अशा सर्व क्षेत्रात त्यांनी मोठे काम केले असल्याने ते खरे विकास पुरुष ठरले असल्याचे ते म्हणाले. तर गणपतराव सांगळे म्हणाले की आगामी काळामध्ये सोसायटी सक्षमीकरणासाठी सरकारकडून अनुदान मिळावे. याचबरोबर संस्थापातळीवरील सचिवांना केडर मध्ये सहभागी करून घ्यावे. या कार्यक्रमाचे प्रास्ताविक जिल्हा बँकेचे मुख्य कार्यकारी अधिकारी रावसाहेब वर्पे यांनी केले .सूत्रसंचालन नामदेव कहांडळ यांनी केले. तर तालुका विकास अधिकारी अशोक थोरात यांनी आभार मानले. यावेळी संगमनेर तालुक्यातील विविध संस्थांचे पदाधिकारी,सेवा सोसायटीचे चेअरमन ,सेक्रेटरी, बँकेचे अधिकारी मोठ्या संख्येने उपस्थित होते.
