AMC : नगर : क्षय रोगाबाबत नागरिकांमध्ये जनजागृती आवश्यक आहे. त्यातून वेळीच रुग्ण शोधून त्यांच्यावर योग्य उपचार करता येतात. या उपक्रमात आरोग्य विभागाने (Health Department) चांगली मेहनत घेऊन काम केले आहे. त्यामुळेच महापालिकेला (AMC) राज्यात पहिल्या तीन क्रमांकात स्थान मिळाले आहे. नागरिकांनीही लक्षणे आढळल्यास तत्काळ महापालिकेच्या नवी पेठ येथील क्षयरोग (TB) विभागात संपर्क साधून तपासणी करून घ्यावी, असे आवाहन आयुक्त यशवंत डांगे (Yashwant Dange) यांनी केले आहे.

नक्की वाचा : नागपूर हिंसाचाराचा मास्टरमाईंड असलेल्या फहिम खानच्या घरावर बुलडोझर

शहरातून प्रभात फेरी काढत जनजागृती

जागतिक क्षय रोग दिनानिमित्त शहरातून प्रभात फेरी काढण्यात आली. यात महापालिकेच्या आरोग्य विभागाच्या अधिकारी, कर्मचाऱ्यांसह आशा सेविकांनी सहभाग घेतला. आयुक्त यशवंत डांगे यांच्या हस्ते या रॅलीचे उद्घाटन करण्यात आले. जुनी महापालिका, आशा टॉकीज, माणिक चौक, भिंगारवाला चौक, तेलिखुंट, डाळमंडई, पारशाखुंट, बूथ हॉस्पिटल पर्यंत ही रॅली काढण्यात आली. यातून क्षय रोगाच्या लक्षणांबाबत जनजागृती करण्यात आली. तसेच, प्रयत्न नर्सिंग होम, बूथ हॉस्पिटल, आनंदऋषीजी नर्सिंग कॉलेज असे चार नर्सिंग कॉलेजचे विद्यार्थी व रोटरी क्लब ऑफ अहमदनगर सेंट्रल यात सहभागी झाले होते.

अवश्य वाचा : ‘मी खरं सांगितलं असतं तर आमचं सरकारच आलं नसतं’-अजित पवार

महापालिकेच्या आरोग्य विभागाकडून १०० दिवसाचे अभियान (AMC)

महापालिकेच्या आरोग्य विभागाकडून १०० दिवसाचे अभियान राबविण्यात आले. यात सुमारे २०० शिबिरे ७ डिसेंबर ते १७ मार्च या कालावधीत घेण्यात आले. त्यात २१० रुग्ण आढळले असून त्यांच्यावर उपचार सुरू आहेत. तपासण्या, उपचार पूर्णपणे मोफत आहेत. नवी पेठ येथे महापालिकेचा क्षयरोग विभाग असून तेथे सर्व अत्याधुनिक तपासण्या मोफत करण्यात येत आहेत. प्रत्येक रुग्णाला सहा महिन्यात ६ हजार रुपये सहा महिन्यात शासनाकडून देण्यात येत आहेत.

दरम्यान, क्षयरोग जनजागृतीसाठी नवीन महापालिका कार्यालयात रांगोळी स्पर्धा तसेच, डॉ. विखेपाटील कॉलेज येथे पोस्टर व रिल स्पर्धा आयोजित करण्यात आली आहे. क्षयरोग जनजागृतीपर या स्पर्धा मंगळवारी (ता. २५) घेण्यात येणार असल्याचे वैद्यकीय आरोग्य अधिकारी डॉ. सतीश राजूरकर यांनी सांगितले.