Chess Tournament : नगर : शांतीकुमारजी फिरोदिया मेमोरियल फाउंडेशन (Shantikumarji Firodia Memorial Foundation) प्रायोजित अखिल भारतीय मोतीलालजी फिरोदिया अखिल भारतीय खुली क्लासिकल आंतरराष्ट्रीय मानांकन बुद्धिबळ स्पर्धचे (Chess Tournament) बुधवारी (ता. ७) ते रविवारी (ता. ११) या कालावधीत अहिल्यानगरच्या जुन्या कापड बाजारातील सप्तक सदन येथे आयोजित करण्यात आली आहे, अशी माहिती अहमदनगर जिल्हा बुद्धिबळ संघटनेचे अध्यक्ष नरेंद्र फिरोदिया (Narendra Firodia) यांनी दिली.
भारतभरातून स्पर्धक येणार (Chess Tournament)
या स्पर्धेत भारतातून बुद्धिबळ खेळाडू खेळण्यासाठी येणार आहेत. आत्तापर्यंत गुजरात, आंध्र प्रदेश, दिव, दमन, गोवा, तमिळनाडू, महाराष्ट्र आदी राज्यातून अडीचशेच्या वर खेळाडूंनी आपला प्रवेश निश्चित केला आहे. फीडे मास्टर वेदांत पानसरे (मुंबई), इंटर नॅशनल मास्टर राहुल सगमा (गोवा ), इंटरनॅशनल मास्टर विक्रमादित्य कुलकर्णी (महाराष्ट्र) सहित अनेक दिग्गज खेळाडू या स्पर्धेत सहभागी होणार आहेत असे अहमदनगर जिल्हा बुद्धिबळ संघटनेचे उपाध्यक्ष नरेंद्र कुलकर्णी यांनी सांगितले. साडेपाच वर्षांचा बाल खेळाडू तसेच ८३ वर्षांचे वयस्कर खेळाडू सुद्धा यात आपले बुद्धीचे बळ पणाला लावणार आहेत, असे सचिव यशवंत बापट यांनी सांगितले.
या स्पर्धेत एकूण ९ फेऱ्या होणार (Chess Tournament)
बुधवारी (ता. ७) सकाळी ११.३० वाजता या स्पर्धेचे उद्घाटन होणार आहे. त्यानंतर स्पर्धा सुरू होईल. या स्पर्धेत एकूण ९ फेऱ्या होणार आहेत. शेवटी रविवारी (ता. ११) दुपारी ३ वाजता अहमदनगर जिल्हा बुद्धिबळ संघटनेचे अध्यक्ष नरेंद्र फिरोदिया यांच्या हस्ते बक्षीस वितरण समारंभ होणार आहे. या स्पर्धेत विविध गटात प्रोत्साहन पर रोख बक्षिसे, आकर्षक ५० करंडक व सर्व खेळाडूंना सहभाग प्रमाणपत्र देण्यात येणार आहेत.
या स्पर्धेचे प्रमुख पंच प्रवीण ठाकरे (जळगाव) हे असून त्यांना शार्दुल टापसे (सातारा), पवन राठी सहाय्यक पंच म्हणून जबाबदारी पार पाडणार आहेत. ह्या दोघांना ६ सहाय्यक पंच मदत करणार आहेत. ही स्पर्धा जागतिक बुद्धिबळ संघटनेच्या नियम नियमावली नुसार होणार आहे. तसेच या स्पर्धेत आंतरराष्ट्रीय दर्जाचे १०० लाकडी पट व सोंगट्या चा वापर महाराष्ट्रात पहिल्यांदा होणार आहे. अहमदनगर जिल्हा बुद्धिबळ संघटनेचे सदस्य सुबोध ठोंबरे, परूनाथ ढोकळे, शाम कांबळे, प्रशांत गंगेकर, देवेंद्र ढोकळे, मनीष जस्वानी, प्रकाश गुजराती, चेतन कड, संजय खडके, नवनीत कोठारी, डॉ. स्मिता वाघ, शुभदा ठोंबरे, रोहिणी अडकर आदी स्पर्धा यशस्वी होण्यासाठी प्रयत्नशील आहेत. अहिल्यानगर शहरातील खेळाडूंनी जास्तीत जास्त संख्येने उपस्थित राहण्याचे आवाहन करण्यात आले आहे. तसेच वरील स्पर्धेत अधिक माहितीसाठी यशवंत बापट व पारूनाथ ढोकळे यांच्याशी संपर्क साधण्याचे आवाहन आयोजकांतर्फे करण्यात आले आहे.