नगर : मराठी चित्रपट प्रेमी रसिकांसाठी मार्च महिना खूपच खास असणार आहे. कारण या महिन्यामध्ये अनेक चांगल्या धाटणीचे चित्रपट प्रेक्षकांच्या भेटीला येणार आहे. यापैकी एक चित्रपट म्हणजे तेरवं. काही दिवसांपूर्वीच या चित्रपटाची घोषणा करण्यात आली होती. आता या बहुचर्चित चित्रपटाचा ट्रेलर केंद्रीय मंत्री व भाजपचे ज्येष्ठ नेते नितीन गडकरी (Nitin Gadkari) यांच्या हस्ते लॉन्च (Launch) करण्यात आला.
विदर्भाच्या मातीतून असे चित्रपट यायला हवेत आणि आपल्या समस्या मांडल्या जायला हव्यात, असे यावेळी नितीन गडकरी म्हणाले. नितीन गडकरी यांच्या निवासस्थानी हा ट्रेलर लॉन्च संपन्न झाला. याप्रसंगी चित्रपटाचे लेखक श्याम पेठकर, संगीतकार वीरेंद्र लाटणकर,अभिनेत्री नेहा दंडाळे, श्रद्धाताई तेलंग, देवेंद्र लुटे ही कलावंत मंडळी आणि पत्रकार अजय बिवडे आवर्जून उपस्थित होते. हा चित्रपट महिला दिनानिमित्त म्हणजे ८ मार्चला प्रेक्षकांच्या भेटीला येणार आहे.
नक्की वाचा : मराठा आंदोलनामुळे संभाजीनगर, जालना, बीड जिल्ह्यातील इंटरनेट सेवा बंद
‘तेरवं’ शेतकरी आत्महत्येवर करणार भाष्य (Terav Trailer)
विदर्भ, मराठवाडा, खानदेश या कापूसपट्ट्यामध्ये मोठ्या प्रमाणात शेतकरी आत्महत्या होतात. हा एक अत्यंत संवेदनशील विषय आहे आणि ‘कॉटन सॉईल तंत्र’ या विषयावर यासंदर्भात काम होणे गरजेचे आहे. पण श्याम पेठकर यांनी याआधी ‘गोष्ट छोटी डोंगराएवढी’ या चित्रपटाच्या माध्यमातून शेतकरी आत्महत्या विषय अत्यंत परिणामकारक पद्धतीने मांडला होता. आता आगामी ‘तेरव’ या चित्रपटातून त्यांनी आत्महत्याग्रस्त शेतकरी कुटुंबातील त्या शेतकऱ्याची मागे एकटी उरलेली पत्नी म्हणजे एकल महिला यांच्या संघर्षावर चित्रपट लिहून लढण्याची उर्मी देणारा चित्रपट निर्माण केलेला आहे.
चित्रपटात नेमके काय ? (Terav Trailer)
हा चित्रपट आत्महत्याग्रस्त शेतकरी कुटुंबातील एकल महिलांच्या जीवन संघर्षावर घेतलेला आहे आणि त्या संकटांना न घाबरता कसा लढा देतात हे या चित्रपटात दाखवले आहे. या चित्रपटात किरण खोजे, संदीप पाठक, किरण माने, नेहा दंडाळे या कलावंतांसह विदर्भातील मधु जोशी, श्रद्धा तेलंग, प्रभाकर आंबोने, वत्सला पोलकमवार, प्रवीण इंगळे, देवेंद्र लुटे, यशवंत चोपडे, शर्वरी पेठकर, संहिता इथापे, वैदेही चौरे, दिलीप देवरणकर या कलावंतांनी भूमिका केल्या आहेत. सुप्रसिद्ध वऱ्हाडी कवी दिवंगत शंकर बडे यांच्या कवितेला गाण्याचा साज देण्यात आलेला आहे. चित्रपटाचे थीम सॉंग ज्ञानेश वाकुडकर यांनी लिहिले आहे. आणखी दोन गाणी “तेरव” या नाटकात शाम पेठकर यांनी लिहिलेली चित्रपटात घेण्यात आलेली आहे.
अवश्य वाचा : आशा सेविकांच्या मागण्यांसाठी विजय वडेट्टीवार आक्रमक