Sispe-Infinite Scam : नगर : जिल्ह्यातील हजारो गुंतवणूकदारांची फसवणूक (Fraud Against Investors) झाल्याचा आरोप असलेल्या बहुचर्चित सिस्पे, इनफिनाईट बिकन व तत्सम कंपन्यांच्या आर्थिक घोटाळा (Sispe-Infinite Scam) प्रकरणातील ११४ कोटी ९३ लाख रूपयांच्या मालमत्तेच्या जप्तीच्या एमपीआयडी प्रस्तावाला राज्य शासनाने (State Government) मंजुरी दिली आहे. शासनाच्या आदेशानंतर संबंधित बँक खाती, शेअर बाजारातील डिमॅट खाती आणि स्थावर मालमत्तेवर शासनाचा ताबा आला असून पुढील कायदेशीर प्रक्रिया सुरू करण्यात येणार आहे.

नक्की वाचा : राजकीय दबाव झुगारून गुन्हेगारांचा बिमोड करा; संजय येनपुरे यांचे निर्देश

जप्त मालमत्तेबाबत पुढील प्रक्रिया पार पडणार

या प्रकरणात आर्थिक गुन्हे शाखेने तपासादरम्यान कंपनी, तिचे संचालक, एजंट आणि संबंधितांच्या नावावरील मालमत्तेचा शोध घेतला. त्यामध्ये ११३ कोटी ३८ लाख रूपयांची बँक व डिमॅट खात्यांतील रक्कम तसेच एक कोटी ५५ लाख रूपयांची स्थावर मालमत्ता आढळून आली. या सर्वांचा समावेश असलेला ११४ कोटी ९३ लाख रूपयांचा एमपीआयडी प्रस्ताव शासनाकडे सादर करण्यात आला होता. शासनाने या प्रस्तावाला मंजुरी दिल्यानंतर संबंधित मालमत्तांवर जप्तीची प्रक्रिया लागू झाली आहे. या मालमत्तेचे व्यवस्थापन आणि पुढील कायदेशीर कार्यवाही करण्यासाठी श्रीगोंदा-पारनेर विभागाचे उपविभागीय दंडाधिकारी (प्रांत अधिकारी) यांची सक्षम प्राधिकारी म्हणून नियुक्ती करण्यात आली आहे. त्यांच्या देखरेखीखाली जप्त केलेल्या रोख रकमेबाबत व स्थावर मालमत्तेबाबत पुढील प्रक्रिया पार पडणार आहे.

🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a

तत्सम कंपन्यांविरोधात चार गुन्हे दाखल (Sispe-Infinite Scam)

श्रीगोंदा, सुपा आणि तोफखाना पोलीस ठाण्यांत सिस्पे, इनफिनाईट व तत्सम कंपन्यांविरोधात चार गुन्हे दाखल असून त्यांचा तपास आर्थिक गुन्हे शाखेकडून सुरू आहे. तपासाच्या सुरूवातीला श्रीगोंदा पोलीस ठाण्यात गुन्हा दाखल झाला होता. त्यामध्ये एमपीआयडी कायद्याची कलमे लागू करण्यात आली आहे. या संपूर्ण प्रकरणाचा तपास पोलीस अधीक्षक मुम्मका सुदर्शन व पोलीस उपअधीक्षक गणेश उगले यांच्या मार्गदर्शनाखाली पोलीस निरीक्षक डॉ. शरद गोर्डे यांचे पथक करत आहेत.