Shatpavali: अनेक घरांमध्ये रात्रीचे जेवण झाल्यानंतर काही मिनिटे शतपावली (Shatpavali) करण्याची परंपरा आहे. आधुनिक जीवनशैलीत ही सवय कमी होत असली, तरी आरोग्यतज्ज्ञांच्या मते जेवणानंतर काही वेळ हलके चालणे शरीरासाठी अत्यंत फायदेशीर ठरते. विशेषतः पचनक्रिया सुधारण्यापासून रक्तातील साखरेचे नियंत्रण आणि चांगल्या झोपेपर्यंत शतपावलीचे अनेक सकारात्मक परिणाम दिसून येतात.
तज्ज्ञांच्या मते, रात्रीचे जेवण झाल्यानंतर लगेच झोपणे टाळावे. त्याऐवजी 10 ते 20 मिनिटे संथ गतीने चालल्यास अन्नाचे पचन सुरळीत होण्यास मदत होते. यामुळे पोट फुगणे, अपचन, गॅस आणि अॅसिडिटी यांसारख्या समस्या कमी होऊ शकतात.
🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a
रक्तातील साखर नियंत्रणात ठेवण्यास मदत (Shatpavali)
जेवणानंतर थोडावेळ चालल्याने शरीरातील स्नायू ग्लुकोजचा अधिक प्रभावी वापर करतात. त्यामुळे रक्तातील साखरेची पातळी अचानक वाढण्याचा धोका कमी होऊ शकतो. मधुमेह असलेल्या व्यक्तींनी डॉक्टरांच्या सल्ल्यानुसार नियमित शतपावली केल्यास त्याचा फायदा होऊ शकतो.
वजन नियंत्रणासाठीही उपयुक्त
रात्री जेवणानंतर हलका व्यायाम केल्याने शरीरातील ऊर्जा खर्च होण्यास मदत होते. त्यामुळे अतिरिक्त कॅलरी साठण्याची शक्यता कमी होते आणि वजन नियंत्रणात ठेवण्यास हातभार लागतो. मात्र, जेवणानंतर लगेच धावणे किंवा जोरदार व्यायाम करणे टाळावे.
हृदयाच्या आरोग्यासाठी फायदेशीर
नियमित चालण्यामुळे रक्ताभिसरण सुधारते, हृदयावरील ताण कमी होतो आणि संपूर्ण शरीरात ऑक्सिजनचा पुरवठा अधिक चांगल्या प्रकारे होतो. दीर्घकाळ ही सवय ठेवली तर हृदयविकाराचा धोका कमी करण्यास मदत होऊ शकते.
चांगली झोप लागण्यास मदत
शतपावलीमुळे शरीर रिलॅक्स होते आणि मानसिक ताणही कमी होतो. त्यामुळे रात्री अधिक शांत आणि दर्जेदार झोप लागण्यास मदत मिळू शकते. मात्र, अतिजोरात चालणे किंवा व्यायाम केल्यास उलट झोपेवर परिणाम होऊ शकतो.
शतपावली करताना या गोष्टी लक्षात ठेवा
- जेवणानंतर लगेच धावू नका; जेवनानंतर 5-10 मिनिटांनी चालायला सुरुवात करा.
- 10 ते 20 मिनिटे संथ गतीने चालणे पुरेसे आहे.
- अतिजड जेवण टाळा आणि चालताना शरीरावर ताण येणार नाही याची काळजी घ्या.
- वृद्ध, गर्भवती महिला किंवा गंभीर आजार असलेल्या व्यक्तींनी डॉक्टरांच्या सल्ल्यानुसार ही सवय अंगीकारावी.
आरोग्यतज्ज्ञांच्या मते, शतपावली हा व्यायामाचा पर्याय नसला तरी निरोगी जीवनशैलीचा महत्त्वाचा भाग ठरू शकतो. दररोज रात्री जेवणानंतर काही मिनिटे चालण्याची सवय पचनसंस्था, हृदय आणि चयापचय निरोगी ठेवण्यास मदत करू शकते.
हेही वाचा: अपुरी झोप आरोग्यासाठी धोकादायक; पुरेशी झोप घ्या, धोका टाळा!
