नगरच्या कलाक्षेत्राची चार दशकांहून अधिक काळ सेवा करणाऱ्या स्वतंत्र प्रतिभेच्या कलाकाराला अखेरचा निरोप

Shridhar Ambhore : अहिल्यानगर : राज्यासह देशपातळीवर आपल्या स्वतंत्र चित्रशैलीने ठसा उमटविणारे ज्येष्ठ रेखाचित्रकार (Illustrator) श्रीधर अंभोरे (Shridhar Ambhore) (वय ८०) यांचे सोमवारी (दि. १०) पहाटे जालना येथे निधन झाले. त्यांच्या निधनाने अहिल्यानगरच्या कलाक्षेत्रासह साहित्य, संगीत, नाट्य आणि सांस्कृतिक क्षेत्रात शोककळा पसरली आहे. अंभोरे यांनी आपल्या प्रदीर्घ कलाप्रवासातून नगरच्या सांस्कृतिक क्षेत्रात (Cultural Field) मोलाचे योगदान दिले होते.

रेखाचित्रकलेला वेगळी ओळख मिळवून दिली

श्रीधर अंभोरे यांचे चार दशकांहून अधिक काळ अहिल्यानगरमध्ये वास्तव्य होते. नगर हीच त्यांची कर्मभूमी राहिली. आपल्या कुंचल्यातून विविध विषयांना कलात्मक अभिव्यक्ती देताना त्यांनी रेखाचित्रकलेला वेगळी ओळख मिळवून दिली. त्यांच्या चित्रांमध्ये केवळ कलात्मक सौंदर्य नव्हे, तर सामाजिक जाणिवा, मानवी जीवन, संस्कृती आणि सभोवतालच्या वास्तवाचे दर्शन घडत असे. त्यामुळे त्यांच्या कलाकृतींना रसिकांकडून मोठी दाद मिळाली.

🪀 अहिल्यानगर जिल्ह्यातील अपडेट्स मिळविण्यासाठी क्लिक करा.
📲 https://chat.whatsapp.com/GuIoV5EQN6PEvBPT69TR0a

कलाकृतींमध्ये वैचारिक प्रगल्भता (Shridhar Ambhore)

अंभोरे हे केवळ रेखाचित्रकार नव्हते, तर विविध कलांचा आणि विषयांचा सखोल अभ्यास असलेले कलासक्त व्यक्तिमत्त्व होते. चित्रकलेसोबतच साहित्य, संगीत, लोकसंगीत, नाट्यकला, तत्त्वज्ञान आणि अध्यात्म या विषयांचा त्यांचा चांगला अभ्यास होता. विविध क्षेत्रांतील त्यांच्या वाचनामुळे आणि चिंतनामुळे त्यांच्या कलाकृतींमध्ये वैचारिक प्रगल्भता जाणवत असे.

स्वतंत्र प्रतिभेचे कलाकार म्हणून त्यांनी राज्यात तसेच देशपातळीवर आपली वेगळी ओळख निर्माण केली. त्यांच्या कलाक्षेत्रातील उल्लेखनीय योगदानाची दखल घेत त्यांना प्रतिष्ठेचा ‘फाय फाउंडेशन’ पुरस्कार यासह अनेक पुरस्कार व मानसन्मान प्राप्त झाले होते. त्यांच्या चित्रांना देशातील विविध ठिकाणी रसिकांची पसंती मिळाली. अमेरिकेत आयोजित करण्यात आलेल्या चित्रप्रदर्शनातही त्यांच्या चित्रांचा समावेश झाला होता. त्यामुळे त्यांच्या कलेचा लौकिक देशाच्या सीमा ओलांडून परदेशातही पोहोचला होता.

अहिल्यानगरमध्ये दीर्घकाळ वास्तव्य असल्याने अंभोरे यांचा शहरातील कलाकार, साहित्यिक, लेखक, संगीतप्रेमी, नाट्यकर्मी आणि सांस्कृतिक कार्यकर्त्यांशी जिव्हाळ्याचा संबंध होता. आपल्या मनमिळाऊ स्वभावामुळे त्यांनी नगरमध्ये मोठा मित्रपरिवार आणि चाहतावर्ग निर्माण केला होता. कलाविषयक चर्चा, साहित्य-संगीतावरील संवाद आणि विविध सांस्कृतिक उपक्रमांमध्ये त्यांचा उत्स्फूर्त सहभाग असायचा.

अंभोरे यांच्या निधनाने अहिल्यानगरच्या कलाक्षेत्राची मोठी हानी झाली असल्याची भावना व्यक्त होत आहे. त्यांच्या जाण्याने एक प्रतिभावंत कलाकार तर हरपलाच; मात्र विविध कलांचा आणि विषयांचा सखोल अभ्यास असलेले बहुआयामी व्यक्तिमत्त्वही काळाच्या पडद्याआड गेले आहे. त्यांच्या कलाकृती आणि कलाप्रवासाच्या आठवणी पुढील पिढ्यांसाठी प्रेरणादायी ठरणार आहेत.

दरम्यान, श्रीधर अंभोरे यांच्या पार्थिवावर सोमवारी दि. १० रोजी दुपारी २ वाजता जालना येथील छत्रपती संभाजीनगर रोडवरील रामतीर्थ स्मशानभूमीत अंत्यसंस्कार करण्यात आले. यावेळी कला, साहित्य, सांस्कृतिक क्षेत्रातील मान्यवरांसह नातेवाईक, मित्रपरिवार आणि चाहत्यांचा मोठा जनसमुदाय उपस्थित होता. अत्यंत भावपूर्ण वातावरणात अंभोरे यांना अखेरचा निरोप देण्यात आला.