Kunal Kamra : “तुम्ही स्टॅण्डअप कॉमेडी करा. मात्र,अपमानित करण्याचं काम कोणी करत असेल, तर ते सहन केलं जाणार नाही”,असा इशारा मुख्यमंत्री देवेंद्र फडणवीस (Chief Minister Devendra Fadnavis) यांनी दिला आहे. स्टॅण्डअप कॉमेडिअन कुणाल कामराने (Stand-up comedian Kunal Kamra) उपमुख्यमंत्री एकनाथ शिंदे (Eknath Shinde) यांच्यावर एक विडंबनात्मक गाणं रचून ते शोमध्ये सादर केलं आहे. त्यावर मुख्यमंत्री देवेंद्र फडणवीस यांनी आपली प्रतिक्रिया दिली. या प्रकरणी कुणाल कामराविरोधात गुन्हा दाखल झाला आहे. तसेच कुणाल कामराच्या विरोधात शिवसेना (शिंदे) पक्षाचे कार्यकर्ते आक्रमक झालेत. त्याच्यावर कारवाई करण्याची मागणी पक्षाच्या नेत्यांकडून करण्यात येत आहे.
नक्की वाचा : नागपूर हिंसाचाराचा मास्टरमाईंड असलेल्या फहिम खानच्या घरावर बुलडोझर
देवेंद्र फडणवीस पुढे म्हणाले की, “स्टँडअप कॉमेडी करण्याचा अधिकार कोणालाही आहे.मात्र,स्वातंत्र्याचा स्वैराचार करण्याचा अधिकार कोणालाही नाही.खरं म्हणजे कुणाल कामराला हे माहिती पाहिजे की,महाराष्ट्रातील जनतेने २०२४ साली कोण गद्दार आणि कोण खुद्दार? हे दाखवून दिलेलं आहे. हिंदूहृदयसम्राट बाळासाहेब ठाकरे यांची विरासत कोणाकडे गेली? हे जनतेने दाखवून दिलेलं आहे.त्यामुळे अशा प्रकारे खालच्या पातळीवर कॉमेडी करून राज्याचे माजी मुख्यमंत्री तथा विद्यमान उपमुख्यमंत्री एकनाथ शिंदे यांच्याबाबत अनादर करण्याचा अधिकार कोणालाही नाही, हे चुकीचं आहे”,असं देवेंद्र फडणवीस यांनी म्हटलं आहे.
अवश्य वाचा : क्रूर आणि सूडभावनेने वागणारा माणूस म्हणजे फक्त देवेंद्र फडणवीस – मनोज जरांगे
“तुम्ही जरुर स्टँडअप कॉमेडी करा, पण अपमानित करण्याचं काम कोणी करत असेल तर हे सहन केलं जाणार नाही.हे अतिशय चुकीचं आहे.स्टँडअप कॉमेडियन कुणाल कामराने माफी मागितली पाहिजे. तसेच कुणाल कामरा जे संविधानाचं पुस्तक दाखवत आहेत, ते संविधान जर त्यांनी वाचलं असेल तर संविधानाने सांगितलेलं आहे की, स्वातंत्र्याचा स्वैराचार करता येणार नाही. दुसऱ्याच्या स्वातंत्र्यावर तुम्हाला अतिक्रमण करता येणार नाही. त्यामुळे आमची मागणी आहे की,त्यांनी माफी मागितली पाहिजे”,असं देवेंद्र फडणवीस यांनी म्हटलं आहे.
‘कुणाल कामरावर योग्य ती कायदेशीर कारवाई केली जाईल’ (Kunal Kamra)
“एखादा स्टँडअप कॉमेडीयन अशा प्रकारे गद्दार म्हणू शकत नाही. हिंदूहृदयसम्राट बाळासाहेब ठाकरे यांच्या विचारांशी ज्यांनी गद्दारी केली, त्यांना घरी बसवण्याचं काम जनतेने केलेलं आहे. एखाद्याला कॉमेडी करण्याचा अधिकार आहे. मात्र, जर जाणूनबुजून अपमान करण्याचा प्रयत्न कोणी करत असेल तर हे सहन केलं जाणार नाही. यावर योग्य ती कायदेशीर कारवाई केली जाईल”, असं देवेंद्र फडणवीस यांनी म्हटलं आहे.
कुणाल कामराच्या विरोधात शिवसैनिक आक्रमक(Kunal Kamra)
कुणाल कामराने खार येथील युनीकॉन्टिनेंटल हॉटेलमधील द हॅबिटॅट क्लबमध्ये शो घेतला होता. या क्लबमध्ये जाऊन एकनाथ शिंदेंच्या समर्थकांनी धुडगूस घातला. या क्लबमधील खुर्च्यांची आणि संपूर्ण सेटची तोडफोड करण्यात आली आहे.