Modernization of Pune Junction : रेल्वे मंत्र्यांच्या (Railway Minister) हस्ते पुणे स्थानकावर ‘पुणे यार्ड रिमॉडेलिंग’ (Modernization of Pune Junction) अंतर्गत ६ नवीन प्लॅटफॉर्मचे बांधकाम आणि इतर पायाभूत सुविधांच्या कामांची पायाभरणी हाेणार आहे. केंद्रीय रेल्वे, माहिती व प्रसारण तसेच माहिती तंत्रज्ञान मंत्री अश्विनी वैष्णव (Ashwini Vaishnaw) हे आज (दि. १७) रोजी दुपारी ३.३० वाजता विविध मान्यवरांच्या उपस्थितीत पुणे रेल्वे स्थानकावर ‘पुणे यार्ड रिमॉडेलिंग’ अंतर्गत ६ नवीन प्लॅटफॉर्मचे बांधकाम आणि इतर पायाभूत सुविधांच्या कामांची पायाभरणी करणार आहेत.

पुणे जंक्शन रेल्वे स्थानक हे मध्य रेल्वेवरील सर्वात व्यस्त रेल्वे स्थानकांपैकी एक आहे आणि ते पुणे शहर तसेच आसपासच्या औद्योगिक व शैक्षणिक क्षेत्रासाठी रेल्वेचे मुख्य प्रवेशद्वार म्हणून काम करते.

सध्याची पायाभूत सुविधा

पुणे जंक्शन येथे सध्या मेल/एक्सप्रेस आणि पॅसेंजर गाड्यांच्या सेवेसाठी ६ मुख्य प्लॅटफॉर्म कार्यरत आहेत; त्यापैकी केवळ २ प्लॅटफॉर्मवर २२ हून अधिक कोचेस असलेल्या मेल आणि एक्सप्रेस गाड्या थांबण्याची क्षमता आहे. हे स्थानक सध्या २ प्रवेश/निर्गमन मार्ग, ३ पादचारी पूल आणि इतर प्रवासी सुविधांच्या माध्यमातून प्रवाशांची मोठी ये-जा हाताळते. पुणे येथून दररोज २०० हून अधिक गाड्या ओरीजनेट/टर्मिनेट/ किंवा तिथून पुढे जातात आणि हे स्थानक दररोज १.५ लाखांहून अधिक प्रवाशांची हाताळणी करते, ज्यामुळे ते महाराष्ट्रातील सर्वात व्यस्त रेल्वे स्थानकांपैकी एक बनले आहे.

🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a

पुनर्विकास प्रकल्पांची आवश्यकता (Modernization of Pune Junction)

पुणे जंक्शन सध्या त्याच्या कमाल मर्यादा क्षमतेसह कार्यरत आहे, त्यामुळे मोठ्या प्रमाणावर विस्तार आणि पुनर्विकास प्रकल्पांची आवश्यकता निर्माण झाली आहे. पुण्याला भविष्यासाठी सज्ज असे ‘मेगा टर्मिनल’ बनवण्यासाठी, ४७३ कोटी रुपये खर्चाची यार्डाची सर्वसमावेशक पुनर्रचना, ६ नवीन प्लॅटफॉर्मचे बांधकाम आणि तिसऱ्या प्रवेशद्वाराचे काम यांसारखी पायाभूत सुविधांची कामे हाती घेण्यात आली आहेत.

प्रस्तावित पायाभूत सुविधांची कामे – एका दृष्टीक्षेपात :
1). नवीन प्लॅटफॉर्म, प्लॅटफॉर्मचा विस्तार आणि इतर कामे
अतिरिक्त रहदारी हाताळण्यासाठी आणि अधिक लांबीच्या गाड्या चालवण्यासाठी, ७, ८, ९, १०, ११ आणि १२ क्रमांकाचे ६ नवीन पूर्ण-लांबीचे प्लॅटफॉर्म बांधले जात आहेत.
२४/२६ डब्यांच्या गाड्या सामावून घेण्यासाठी प्लॅटफॉर्म क्रमांक २, ३, ४, ५ आणि ६ चा विस्तार केला जात आहे. कार्यक्षमतेतील लवचिकता वाढवण्यासाठी ‘डबल डायमंड स्लिप’ (DDS) काढून टाकण्याचे काम हाती घेण्यात आले आहे.
गाड्यांची जलद हाताळणी करण्यासाठी ‘अप’ आणि ‘डाउन’ अशा २ ‘रन-थ्रू’ लाईन्सची तरतूद करण्यात आली आहे.
उपनगरीय आणि लांब पल्ल्याच्या गाड्यांची वाहतूक वेगळी करण्यासाठी आणि गर्दी कमी करण्यासाठी हडपसर आणि घोरपडी कोचिंग मेंटेनन्स कॉम्प्लेक्स (GCMC) दरम्यान तिसरी अतिरिक्त लाईन बांधली जात आहे.

2). सिग्नलिंग आणि पायाभूत सुविधा
आधुनिक आणि सुरक्षित कामकाजासाठी, नवीन ‘ईआय’ इमारत आणि ३ ‘ऑब्जेक्ट कंट्रोलर’ इमारतींसह नवीन ‘इलेक्ट्रॉनिक इंटरलॉकिंग’ प्रणाली कार्यान्वित केली जात आहे.
विश्वसनीयता वाढवण्यासाठी इंजिनच्या देखभालीसाठी ‘इलेक्ट्रिक लोको शेड’ची सुविधा उपलब्ध करून दिली जात आहे.

3). प्रवाशांसाठी सुविधा आणि स्थानक विकास:
*प्रवाशांचा अनुभव सुधारण्यासाठी, नवीन प्लॅटफॉर्मवर प्लॅटफॉर्म शेड, प्रसाधनगृहे, पिण्याच्या पाण्याची सोय, बसण्याची व्यवस्था, दिवे, पंखे, प्रमाणित फलक, गाडीची माहिती देणारे फलक आणि इतर सर्व प्रवासी सुविधा उपलब्ध करून दिल्या जात आहेत.
*मुख्य प्रवेशद्वारावरील गर्दी कमी करण्यासाठी ‘आर. बी. मिल रोड’च्या बाजूला बुकिंग ऑफिस, टीसी कार्यालय, प्रतीक्षा कक्ष, प्रसाधनगृह आणि स्थानक इमारतीसह तिसरे प्रवेश/निर्गमन द्वार विकसित केले जात आहे.
*प्रवाशांच्या सुरळीत हालचालीसाठी, ६ मीटर रुंद पादचारी पूल आणि जुन्या प्लॅटफॉर्म विभागाला नवीन प्लॅटफॉर्म विभागाशी जोडणारा एक ‘स्कायवॉक’ बांधला जात आहे.
*गर्दीच्या काळात आणि सणासुदीच्या काळात गर्दीचे व्यवस्थापन करण्यासाठी ‘कायमस्वरूपी होल्डिंग एरिया’ देखील विकसित केला जात आहे.

• *यार्डच्या पुनर्रचनेचा प्रकल्प आणि ६ अतिरिक्त प्लॅटफॉर्मचे बांधकाम, तसेच इतर पायाभूत सुविधांची कामे यामुळे रेल्वेच्या कामकाजाची क्षमता लक्षणीयरीत्या वाढेल, स्थानकावरील गर्दी कमी होईल आणि या भागातील प्रवाशांना अधिक चांगली व परवडणारी प्रवासाची सुविधा मिळेल.