Census: नगर: महानगरपालिकेच्या वतीने जनगणनेच्या (Census) पहिल्या टप्प्यासाठीची तयारी वेगाने सुरू करण्यात आली आहे. या प्रक्रियेअंतर्गत नियुक्त केलेल्या प्रगणक आणि पर्यवेक्षकांचे प्रशिक्षण सध्या शहरातील विविध केंद्रांवर सुरू आहे. या प्रशिक्षणास गैरहजर राहणाऱ्या कर्मचाऱ्यांची प्रशासनाने गंभीर दखल घेतली असून, अनुपस्थित कर्मचाऱ्यांना महापालिकेकडून नोटीस बजावण्यात येत आहेत, अशी माहिती महापालिका आयुक्त यशवंत डांगे यांनी दिली आहे. आयुक्त यशवंत डांगे यांनी सांगितले की, जनगणनेच्या पहिल्या टप्प्यासाठी महानगरपालिका (Municipal Corporation) क्षेत्रात एकूण ६८८ एचएलबी निश्चित करण्यात आले आहेत. या कामासाठी एकूण ८८३ प्रगणक आणि पर्यवेक्षकांची नियुक्ती करण्यात आली आहे. नियुक्त केलेल्या सर्व कर्मचाऱ्यांना या प्रक्रियेची अचूक माहिती मिळावी यासाठी टप्प्याटप्प्याने प्रशिक्षण दिले जात असून, दररोज तीनशे प्रगणक व पर्यवेक्षकांना प्रशिक्षण देण्याचे नियोजन प्रशासनाने केले आहे.
अवश्या वाचा- मोकाट जनावरांच्या धडकेत बालिका जखमी; पालिकेच्या निष्क्रियतेमुळे नागरिकांच्या जीवाशी खेळ
विविध समित्यांच्या अंतर्गत वेगवेगळ्या केंद्रांवर प्रशिक्षण (Census)
सध्या शहरातील विविध समित्यांच्या अंतर्गत वेगवेगळ्या केंद्रांवर हे प्रशिक्षण सुरू आहे. सावेडी समितीअंतर्गत श्री समर्थ विद्यामंदिर येथे दोन स्वतंत्र खोल्यांमध्ये सुरू असलेल्या प्रशिक्षणासाठी १०० कर्मचाऱ्यांची नियुक्ती होती, मात्र त्यापैकी १४ कर्मचारी आज अनुपस्थित होते. शहर समितीअंतर्गत अशोकभाऊ फिरोदिया हायस्कूल येथे सुरू असलेल्या ५० जणांच्या प्रशिक्षणात दोन जणांनी दांडी मारली. बुरुडगाव समितीअंतर्गत आनंदधाम रोडवरील जनशक्ती ज्युनियर कॉलेजमध्ये दोन खोल्यांत १०० कर्मचाऱ्यांचे प्रशिक्षण सुरू असून त्यापैकी ५ जण अनुपस्थित होते. तसेच, झेंडीगेट समितीअंतर्गत न्यू आर्ट्स, कॉमर्स अँड सायन्स कॉलेजच्या हॉटेल मॅनेजमेंट विभागात ५० जणांचे प्रशिक्षण सुरू असून, तेथेही काही कर्मचारी गैरहजर असल्याचे निदर्शनास आले आहे. प्रशिक्षणाकडे पाठ फिरवणाऱ्या सर्व अनुपस्थित कर्मचाऱ्यांची यादी तयार करण्यात आली असून, त्यांना महानगरपालिकेतर्फे नोटिसा काढण्याची कार्यवाही सुरू करण्यात आली असल्याचे आयुक्त यशवंत डांगे यांनी सांगितले.
