NEET Exam : नगर : नीट 2026 च्या फेरपरीक्षेपूर्वी केंद्र सरकारने एक मोठे पाऊल उचलले आहे. परीक्षा अत्यंत सुरक्षित आणि पारदर्शक वातावरणात पार पाडण्यासाठी टेलीग्राम या मेसेजिंग ॲपवर तात्पुरती बंदी घालण्यात आली आहे. नीट 2026 ची परीक्षा 21 जून रोजी होणार असून, टेलिग्रामवरील ही बंदी 22 जूनपर्यंत लागू राहील. याशिवाय, टेलिग्रामचे मेसेज एडिट करण्याचे फीचर 30 जूनपर्यंत बंद ठेवण्यात येणार आहे. राष्ट्रीय परीक्षा एजन्सीने (NTA) स्पष्ट केले आहे की, परीक्षा सुरक्षित आणि निष्पक्ष पद्धतीने पार पाडण्यासाठी केंद्र सरकारने हा निर्णय घेतला आहे.
हेही वाचा : खरवंडी कासार दरोडा प्रकरणाची उकल; एका आरोपीला अटक
पेपर लीकसाठी वापर
एनटीएच्या माहितीनुसार, काही गुन्हेगारी टोळ्या टेलिग्राम चॅनेल्सचा वापर करून विद्यार्थी आणि त्यांच्या पालकांना कथित प्रश्नपत्रिका देण्याच्या नावाखाली फसवणूक करत होत्या. नीटचा पेपर लीक, पुन्हा नीट 2026 अशा नावांचे चॅनेल्स तयार करून हजारो ते लाखो रुपयांची मागणी केली जात होती. मात्र, एनटीएने स्पष्ट केले आहे की, परीक्षेची प्रश्नपत्रिका पूर्णपणे सुरक्षित असून ती परीक्षेपूर्वी कोणाकडेही उपलब्ध नाही.
नक्की पहा : अल्पवयीन तरुणीची आत्महत्या; मुख्य आरोपी २४ तासांत जेरबंद; शेवगाव पोलिसांची कारवाई
एडिट फिचरही बंद (NEET Exam)
टेलिग्रामवर 22 जूनपर्यंत बंदी घालण्याचे मुख्य कारण स्पष्ट करताना एनटीएने सांगितले की, अनेक प्रकरणांमध्ये टेलिग्रामच्या मेसेज एडिट फीचरचा गैरवापर करण्यात आला होता. परीक्षा संपल्यानंतर जुन्या मेसेजमध्ये फेरबदल करून त्यात खरी प्रश्नपत्रिका जोडली जायची. यामुळे ती प्रश्नपत्रिका परीक्षा सुरू होण्यापूर्वीच लीक झाली होती, असा खोटा भास निर्माण केला जात असे. अशा प्रकारच्या बनावट पेपर लीकच्या अफवा आणि साहित्य पसरवण्याला आळा घालण्यासाठीच हा निर्णय घेण्यात आला आहे. गृह मंत्रालयाच्या अंतर्गत काम करणाऱ्या भारतीय सायबर गुन्हे समन्वय केंद्राने विविध राज्यांच्या पोलिसांनी आणि इलेक्ट्रॉनिक्स आणि माहिती तंत्रज्ञान मंत्रालयाने मिळून अनेक बनावट टेलिग्राम चॅनेल्स आणि बॉट्स (Bots) हटवण्याची धडक कारवाई केली आहे.
