Dr. Abhay Firodia : नगर : फोर्स मोटर्स लिमिटेडचे (Force Motors Ltd.) अध्यक्ष आणि ‘अभय प्रभावना संग्रहालय व ज्ञान केंद्रा’चे संस्थापक डॉ. अभय एन. फिरोदिया (Dr. Abhay Firodia) यांना लंडन येथील वेस्टमिंस्टरमधील ‘हाऊस ऑफ कॉमन्स’मध्ये प्रतिष्ठित ‘इन्स्टिट्यूट ऑफ जैनॉलॉजी’च्या अहिंसा पुरस्काराने (IOJ) सन्मानित करण्यात आले. अहिंसा, शांतता आणि करुणा या जागतिक मूल्यांचा प्रसार करण्यासाठी त्यांनी दिलेल्या प्रदीर्घ योगदानाबद्दल हा आंतरराष्ट्रीय सन्मान त्यांना प्रदान करण्यात आला. डॉ. फिरोदिया हे भारतातील अग्रगण्य उद्योगपती आणि परोपकारी व्यक्तिमत्त्व म्हणून ओळखले जातात. हा पुरस्कार वॅटफर्डचे खासदार आणि ‘जैन ऑल-पार्टी पार्लमेंटरी ग्रुप’चे अध्यक्ष मॅट टुरमेन आणि व्हॅटिकनच्या आंतरधर्मीय संवाद विभागाचे प्रीफेक्ट महामहीम कार्डिनल जॉर्ज जेकब कूवाकाड यांच्या हस्ते प्रदान करण्यात आला.
या विशेष सोहळ्याला खासदार बॉब ब्लॅकमन, ‘इंडियन इन्स्टिट्यूट ऑफ जैनॉलॉजी’चे व्यवस्थापकीय विश्वस्त डॉ. मेहुल संघराजका, बॅरनेस शमा टॅटलर, लॉर्ड क्रिश रावल, ‘हार्टफुलनेस मूव्हमेंट’चे ग्लोबल गाईड दाजी (कमलेश पटेल), आर्चबिशप बर्नार्ड लाँगले, साध्वी श्री शिलापिजी महाराज आणि समाजसेवक शांतिलाल मुथा यांच्यासह अनेक मान्यवर उपस्थित होते.
नक्की वाचा : रील स्टारच निघाले लुटारू; सुजित चौधर व कोमल काळेसह चौघांनी मायलेकाला लुटल्याचा आरोप
पुरस्काराचा इतिहास आणि महत्त्व:
‘इन्स्टिट्यूट ऑफ जैनॉलॉजी’ (IOJ) तर्फे दिला जाणारा ‘अहिंसा पुरस्कार’ हा अहिंसा, करुणा आणि सर्व जीवांबद्दल आदर राखण्यासाठी विलक्षण कार्य करणाऱ्या व्यक्तींना दिला जातो. यापूर्वी नेल्सन मंडेला, दलाई लामा आणि ब्रिटनचे राजे किंग चार्ल्स (तिसरे) यांसारख्या जागतिक पातळीवरील महान नेत्यांना या पुरस्काराने गौरविण्यात आले आहे.
🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a
डॉ. फिरोदियांचे औद्योगिक आणि सामाजिक योगदान:
डॉ. फिरोदिया यांच्या नेतृत्वाखाली ‘फोर्स मोटर्स’ने ऑटोमोटिव्ह क्षेत्रात मोठी झेप घेतली आहे. व्यावसायिक वाहने, पॅसेंजर व्हॅन्स आणि रुग्णवाहिकांच्या निर्मितीत कंपनी आघाडीवर असून, भारतातील स्कूल बस आणि रुग्णवाहिकांच्या बाजारपेठेत कंपनीचा सुमारे ७५ टक्के वाटा आहे.औद्योगिक यशापलीकडे, डॉ. फिरोदिया यांनी भारताच्या तात्विक परंपरांवर आणि नैतिक मूल्यांवर नेहमीच भर दिला आहे. जैन तत्त्वज्ञान केवळ अध्यात्मापुरते मर्यादित न ठेवता ते व्यावहारिक, नैतिक आणि दयाळू जीवन जगण्याचा पाया बनावे, यासाठी त्यांनी अविरत प्रयत्न केले आहेत. पुरस्काराबद्दल बोलताना डॉ. फिरोदिया म्हणाले, “अहिंसा हा जैन मूल्यांच्या संपूर्ण सखोल विचारसरणीचा एक शब्दातील सारांश आहे.”
अभय प्रभावना संग्रहालय आणि ज्ञान केंद्र: (Dr. Abhay Firodia)
पुण्याजवळ इंद्रायणी नदीच्या काठावर वसलेले ‘अभय प्रभावना संग्रहालय व ज्ञान केंद्र’ हे जैन धर्म, त्याचे तत्त्वज्ञान आणि भारतीय संस्कृतीवरील त्याचा प्रभाव दर्शवणारे एक अद्वितीय केंद्र आहे. अमर प्रेरणा ट्रस्टच्या ‘फिरोदिया इन्स्टिट्यूट ऑफ फिलॉसॉफी, कल्चर अँड हिस्टरी’तर्फे या संग्रहालयाची निर्मिती करण्यात आली आहे. आधुनिक तंत्रज्ञान, कला आणि स्थापत्यशास्त्राचा मेळ घालत हे केंद्र भावी पिढ्यांसाठी प्रेरणास्थान ठरत आहे.
