नगर : सार्वजनिक आरोग्याचा विचार करून देशातील एका राज्यात तंबाखू आणि निकोटीनयुक्त गुटखा, पान मसाला आणि इतर प्रतिबंधित उत्पादनांवरबंदी घालण्यात आली आहे. कर्नाटक सरकारने (Karnataka Gutkha Ban) हा निर्णय घेतला आहे. एक वर्षासाठी ही बंदी (Ban for one year) घालण्यात आली आहे. सरकारच्या आरोग्य आणि कुटुंब कल्याण विभागांतर्गत असलेल्या अन्न सुरक्षा आणि औषध प्रशासन विभागाने या संदर्भात १० ऑगस्ट, २०२६ रोजी एक शासकीय अधिसूचना जारी केली.
ही बंदी अधिसूचनेच्या तारखेपासून पुढील एक वर्षासाठी संपूर्ण कर्नाटकात लागू राहील. या बंदीअंतर्गत, तंबाखू आणि निकोटीनयुक्त गुटखा, पान मसाला आणि इतर प्रतिबंधित उत्पादनांचे उत्पादन, साठवणूक, वाहतूक, वितरण आणि विक्री यावर बंदी घालण्यात येईल.
नक्की वाचा : पोलीस भरतीचे स्वप्न पाहणाऱ्या पारनेरच्या तरुणीने उचलले टोकाचे पाऊल; गुन्हा दाखल
नियमांचे उल्लंघन केल्यास कारवाई (Karnataka Gutkha Ban)
कर्नाटक सरकारने अन्न सुरक्षा अधिकाऱ्यांच्या नेतृत्वाखाली विशेष तपासणी आणि अंमलबजावणी मोहीम देखील सुरू केली आहे. अधिकाऱ्यांची पथके प्रतिबंधित तंबाखू आणि निकोटीन युक्त उत्पादनांच्या विक्री आणि वितरणावर लक्ष ठेवतील आणि उल्लंघन आढळल्यास कारवाई केली जाईल. अन्न सुरक्षा आणि मानके अधिनियम, २००६ च्या कलम ३० (२) (अ) आणि अन्न सुरक्षा आणि मानके (विक्रीवरील बंदी आणि निर्बंध) विनियम, २०११ च्या नियम २.३.४ अन्वये आपल्या अधिकारांचा वापर करून विभागाने हा आदेश जारी केला आहे.
अवश्य वाचा : प्रा.भाग्यशाली कार्ले यांच्या हर्बल औषध संशोधनाला भारत सरकारचे पेटंट
कर्नाटक सरकारचे जनतेला आवाहन काय? (Karnataka Gutkha Ban)
कर्नाटक अन्न सुरक्षा आणि औषध प्रशासन विभागाने जनतेला आवाहन केले आहे की, प्रतिबंधित तंबाखू किंवा निकोटीन उत्पादनांचे उत्पादन, विक्री किंवा वितरणासंबंधी कोणतीही माहिती आढळल्यास संबंधित अधिकाऱ्यांना कळवावे. सरकारने म्हटले आहे की, राज्यातील तंबाखूच्या व्यसनावर नियंत्रण मिळवणे आणि एक निरोगी व व्यसनमुक्त कर्नाटक घडवण्याच्या दिशेने काम करणे, हा या निर्णयाचा उद्देश आहे. सरकारने या निर्णयाचे वर्णन व्यसनमुक्त आणि निरोगी कर्नाटकच्या दिशेने टाकलेले एक पाऊल असे केले आहे.
यामध्ये अशा सर्व उत्पादनांचाही समावेश होतो, जी स्वतंत्रपणे विकली जातात आणि ज्यांच्या अंतिम उत्पादनात तंबाखू किंवा निकोटीन असते. मग त्यांची नावे काहीही असोत. मग ती उत्पादने पॅक केलेली असोत किंवा नसोत. तसेच ती एकच उत्पादन म्हणून विकली जात असोत किंवा ग्राहकाला ती सहजपणे मिसळता येतील, अशा प्रकारे स्वतंत्रपणे पॅक करून विकली जात असोत. या अधिसूचनेत तंबाखू आणि निकोटीन हे घटक असलेले आणि लहान पिशव्या, पाऊच, पॅकेजेस किंवा कंटेनरमध्ये किंवा इतर कोणत्याही नावाने पॅक केलेले गुटखा आणि पान मसाला यांचा विशेषतः समावेश आहे.
