Leopard : राहुरी : तालुक्यातील कुरणवाडी येथे पिंजऱ्यात अडकलेल्या बिबट्याची बाहेर असलेल्या दोन बिबट्यानी सुटका केली होती. ही घटना ताजी असतानाच काल (ता.२५) रात्री तब्बल तीन बिबटे (Leopard) पिंजऱ्यात अडकले. चिंचाळे शिवारात एकाच पिंजऱ्यात दोन बिबटे तर राहुरी (Rahuri) फॅक्टरी नजीकच्या वाणी मळा येथे एक बिबट्या असे तीन बिबटे एकाच रात्रीत पिंजऱ्यात अडकले आहेत.

नक्की वाचा : बीड जिल्हा रुग्णालयातील बडा डॉक्टर निलंबित;विधानसभेत आरोग्यमंत्र्यांची घोषणा

राहुरी तालुक्यात सर्रासपणे दिसून येत आहेत बिबटे

गेल्या काही दिवसांपासून राहुरी तालुक्यात सर्रासपणे बिबटे दिसून येत आहेत. वडनेर येथे एका शेतकऱ्याला बिबट्याने ठार केले होते. या घटनेनंतर माजी मंत्री प्राजक्त तनपुरे यांनी आक्रमक पावित्रा घेत तालुक्यातील बिबट्याची वाढती संख्या लक्षात घेता पिंजऱ्यांची संख्या वाढवण्याची मागणी केली. त्यानुसार ज्या भागात बिबटे सतत दिसून येत आहेत, त्या ठिकाणी वन विभागाने पिंजरे लावले आहेत. राहुरी तालुक्यातील चिंचाळे येथे रामेश्वर आघाव यांच्या शेतात लावलेल्या एका पिंजऱ्यात चक्क दोन बिबटे अडकले आहेत. बिबटे हे नर व मादी असण्याची शक्यता आहे.

अवश्य वाचा : माध्यमिक शिक्षक सोसायटीत ‘परिवर्तन’

वाणी मळा येथील पिंजऱ्यातही बिबटया झाला जेरबंद (Leopard)

यानंतर राहुरी फॅक्टरी नजीक असलेल्या वाणी मळा येथील गणेगाव रोड येथील पाराजी वाणी यांच्या शेतात ठेवण्यात आलेल्या पिंजऱ्यात बिबटया जेरबंद झाला आहे. घटनास्थळी माजी नगराध्यक्ष सत्यजित कदम, माजी नगरसेवक ज्ञानेश्वर वाणी यांच्यासह परिसरातील नागरिकांनी धाव घेतली. वनविभागास एकच वाहन असून सदर वाहन हे चिंचाळे येथील जेरबंद दोन बिबटयास ताब्यात घेण्यासाठी गेले असल्याने वाणी मळा येथील बिबट्या डिग्रस येथील नर्सरीत नेण्यासाठी अडचण निर्माण झाली असता माजी नगराध्यक्ष कदम यांनी स्वतःच्या कॅम्पर वाहनात जेरबंद बिबट्या नर्सरीत पोहोच केला आहे. ही मोहीम वनक्षेत्रपाल युवराज पाचारणे यांच्या मार्गदर्शनाखाली वनरक्षक समाधान चव्हाण, मदन गाडेकर, ताराचंद गायकवाड, कोहोकडे, सिनारे पथकाने केली आहे.