Mount Abu : पारनेर : तालुक्यातील प्रजापिता ब्रह्माकुमारी ईश्वरीय विश्वविद्यालय केंद्राच्या संचालिका ब्रह्माकुमारी साधना दीदी यांच्या मार्गदर्शनाखाली, पारनेर केंद्राच्या हिराबाई मगर, गजराबाई औटी, संगीता शेळके, संगीता खोडदे, सुशीला माता, लीलावती काळे या सेवाधाऱ्यांचा एक विशेष गट राजस्थानमधील माऊंट आबू (Mount Abu) येथील जागतिक मुख्यालयात (Global Headquarters) समर्पित सेवेसाठी दाखल झाला आहे.
नक्की वाचा : मुख्यमंत्र्यांच्या आश्वासनानंतर डीएसपी चौकातील आंदोलन मागे; धीरज परदेशीच्या अंत्ययात्रेला सुरुवात
आध्यात्मिक नगरीत सेवा करण्याची संधी
अरावली पर्वतरांगांच्या कुशीत वसलेल्या या आध्यात्मिक नगरीत सेवा करण्याची संधी मिळाल्याने या साधकांमध्ये आनंदाचे वातावरण आहे. माऊंट आबू येथील ब्रह्माकुमारीजचे मुख्य केंद्र ‘मधुबन’ हे केवळ एक ठिकाण नसून, ते धरतीवरचे स्वर्ग असल्याचे मानले जाते. या पावन भूमीला स्पर्श करणे म्हणजेच अनेक जन्मांची कर्मे आणि पापांचे क्षालन होणे होय, अशी गाढ श्रद्धा येथे येणाऱ्या साधकांची आहे. अनेक महान तपस्व्यांच्या तपस्येने पावन झालेल्या या आबू पहाडीवर सध्या पारनेरचे सेवाधारी आत्मिक आणि आध्यात्मिक ऊर्जेचे संवर्धन करत आहेत.
🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a
१४० हून अधिक देशांमध्ये शांततेचा संदेश (Mount Abu)
प्रजापिता ब्रह्माकुमारी ईश्वरीय विश्व विद्यालय आज जगातील १४० हून अधिक देशांमध्ये शांततेचा संदेश पसरवत आहे. हे विद्यालय मानवाला देवतुल्य बनवण्याची प्रेरणा आणि आंतरिक शक्ती प्रदान करण्याचे कार्य अविरत करत आहे. मानवाच्या सर्वांगीण विकासासाठी येथे ग्रामविकास उपक्रम, तणावमुक्त जीवनशैली, शिक्षण, वैद्यकीय सेवा, व्यसनमुक्त समाज अभियान आणि योगिक शेती यांसारखे महत्त्वपूर्ण प्रकल्प राबवले जातात. सध्याच्या धकाधकीच्या जीवनात प्रत्येक व्यक्ती सुख आणि शांततेच्या शोधात आहे. यावर उपाय म्हणून विद्यालयात ‘राजयोगाचा’ अभ्यास करून घेतला जातो.
अशांत असलेल्या लोकांनाही जगण्याची नवी प्रेरणा
मानवी मनात येणारे नकारात्मक विचार आत्म्याची शक्ती क्षीण करतात, परंतु नियमित राजयोग अभ्यासामुळे आत्म्याच्या सात मूळ शक्ती—सुख, शांतता, आनंद, प्रेम, पवित्रता, ज्ञान आणि शक्ती—पुन्हा जागृत होतात.या अभ्यास दौऱ्यात सहभागी झालेल्या सेवाधाऱ्यांनी आपला अनुभव व्यक्त करताना सांगितले की, अरावलीच्या या शांत आणि निसर्गरम्य वातावरणात आल्यावर सर्वजण जणू देहभान विसरून जातात. येथे मिळणारा अलौकिक अनुभव केवळ स्वतःलाच नव्हे, तर समाजात दुःखी आणि अशांत असलेल्या लोकांनाही जगण्याची नवी प्रेरणा देणारा आहे. या समर्पित सेवेमुळे पारनेरच्या साधकांसाठी मानवी जीवनाचा एक नवा आणि सुखकर मार्ग खुला झाला आहे, असे या प्रवासातून अधोरेखित होत आहे.
