नगर : जुलै महिना सुरू होण्यास काही दिवसांचा कालावधी बाकी आहे. दर महिन्याच्या पहिल्या तारखेप्रमाणेच, १ जुलै २०२६ पासून (Rule Change 1st July) देशात अनेक महत्त्वाचे आर्थिक आणि व्यावहारिक नियम बदलणार (Financial and practical rules will change) आहेत. या बदलांचा थेट परिणाम नोकरदार वर्ग, पेन्शनधारक, बँक ग्राहक आणि सर्वसामान्य नागरिकांच्या घरगुती बजेटवर पडणार आहे. त्यामुळेच तुमचे आर्थिक नुकसान टाळण्यासाठी १ जुलैपासून नेमके कोणते नियम बदलणार आहेत ते पाहूया…
नक्की वाचा : आत्महत्याग्रस्त शेतकऱ्यांच्या विधवांना केवळ १ रुपयात मिळणार सरकारी जमीन; राज्यसरकारचा मोठा निर्णय
१. एलपीजी सिलिंडर दर पुन्हा बदलाची शक्यता (Rule Change 1st July )
नुकतीच घरगुती एलपीजी सिलिंडरच्या किंमतीत २९ रुपयांची वाढ झाल्यामुळे दिल्लीत गॅस सिलिंडर ९४२ रुपयांवर पोहोचला आहे. गेल्या तीन महिन्यांतील ही दुसरी वाढ होती. आंतरराष्ट्रीय पातळीवर, विशेषतः मध्य पूर्वेतील वाढता तणाव पाहता इंधन पुरवठ्यावर परिणाम होण्याची शक्यता आहे, ज्यामुळे जुलैच्या पहिल्या तारखेला गॅसचे दर हे पुन्हा बदलू शकतात.
२.आधार कार्ड
डिजिटल सेवांचा लाभ सगळ्यापर्यंत पोहोचावा आणि नागरिकांनी आपली माहिती अपडेट ठेवावी, यासाठी युआयडीएआय (UIDAI) ने नागरिकांना मोठा दिलासा दिलाय. आधार मोबाईल ॲपद्वारे ईमेल आयडी अपडेट करण्यासाठी आकारले जाणारे ७५ रुपयांचे शुल्क हे पुढील सहा महिन्यांसाठी पूर्णपणे माफ करण्यात आले आहे. ही मोफत सुविधा १ जुलै ते ३१ डिसेंबर २०२६ या कालावधीत उपलब्ध असेल.
३. रेल्वे प्रवास; विनातिकीट फिरणाऱ्यांना मोठा दणका
भारतीय रेल्वेने गाड्यांमधील शिस्त आणि प्रवाशांच्या सुरक्षेसाठी नियमावली अधिक कडक केलीय. नवीन प्रस्तावानुसार, रेल्वेमध्ये विनातिकीट प्रवास करण्याचा किमान दंड आता २५० रुपयांवरून थेट ५०० रुपये केला जाऊ शकतो. याशिवाय, दुसऱ्याच्या तिकिटावर प्रवास करणे, रेल्वे डब्यात उपद्रव करणे, अनधिकृत फेरीवाले आणि महिला डब्यात घुसणाऱ्यांनाही मोठा दंड भरावा लागेल.
अवश्य वाचा : दफनविधी नंतर ‘मृत’ शब्बीर जिवंत परतला! राहुरीत दफन केलेला मृतदेह कुणाचा?
४. मुदत ठेवीवरील व्याजदरांमध्ये फेरबदल (Rule Change 1st July )
रिझर्व्ह बँकेच्या मॉनिटरी पॉलिसी बैठकीनंतर अनेक बँकांनी आपल्या रणनीतीत बदल केले आहेत. जुलै महिन्याच्या सुरुवातीला वेगवेगळ्या बँका त्यांच्या मुदत ठेवींवरील व्याजदर आणि अटी बदण्याची शक्यता आहे. त्यामुळे नवीन एफडी करताना किंवा जुन्या एफडीचे नूतनीकरण करण्यापूर्वी नागरिकांनी नवीन व्याजदर तपासून घेणे फायदेशीर ठरेल.
५. क्रेडिट कार्डच्या रिवॉर्ड पॉईंट्सवर कात्री
स्टेट बँक ऑफ इंडिया आपल्या काही प्रीमियम कार्ड्सच्या नियमांमध्ये मोठा बदल करणार आहे. १ जुलैपासून ‘PhonePe SBI Credit Card PURPLE’ आणि ‘SELECT BLACK’ या कार्ड्सवर मिळणाऱ्या रिवॉर्ड पॉईंट्सवर मर्यादा आणल्या जाणार आहेत. तसेच काही विशिष्ट व्यवहारांवर आता पॉईंट्स मिळणार नाहीत. एसबीआय सोबतच इतर बँकाही आपल्या कार्ड धोरणात बदल करण्याची शक्यता आहे.
६. पेट्रोल आणि डिझेलच्या किंमतीत बदल होण्याची शक्यता
अमेरिका आणि इराणमधील वादामुळे आंतरराष्ट्रीय बाजारात कच्च्या तेलाच्या किंमती कडाडल्या आहेत. याचा फटका देशांतर्गत इंधन दरांना बसत आहे. मे महिन्यात पेट्रोलच्या दरात सलग चार वेळा वाढ झाली होती. जागतिक बाजारातील हीच अनिश्चितता कायम राहिल्यास जुलै महिन्यात पेट्रोल-डिझेलच्या किमतींमध्ये पुन्हा एकदा वाढ होऊ शकते, किंवा दरात मोठे फेरबदल पाहायला मिळू शकतात.
७. विमान इंधनाच्या किमतीत बदल
याशिवाय, केंद्र सरकारने नुकतेच डिझेल आणि विमानासाठी लागणाऱ्या इंधनावरील निर्यात शुल्कात वाढ केली आहे. आता डिझेलच्या निर्यातीवर प्रति लिटर १४ रुपये आणि एटीएफवर प्रति लिटर १२. ५ रुपये शुल्क लागू करण्यात आले आहे. देशांतर्गत वापरावरील उत्पादन शुल्कात बदल केला नसला तरी, आंतरराष्ट्रीय बाजारपेठेतील किमतींनुसार १ जुलैला एटीएफच्या दरांचे नव्याने पुनरावलोकन केले जाईल, ज्याचा थेट परिणाम विमान प्रवासाच्या तिकिटांवर होऊ शकतो.
१ जुलैपासून लागू होणारे हे नियम तुमच्या दैनंदिन खर्चाशी जोडलेले आहेत. त्यामुळे नवीन महिना सुरू होण्यापूर्वीच या बदलांची नोंद घेऊन आपले आर्थिक नियोजन करा. या सर्व बदलाचा तुमच्या बजेवर परिणाम होण्याची शक्यता आहे.
