नगर : ज्या चित्रपटाची प्रेक्षक आतुरतेने वाट पाहात आहेत तो ‘स्वरगंधर्व सुधीर फडके’ (Swargandharva Sudhir Phadke) लवकरच प्रेक्षकांच्या भेटीला येणार आहे. सुधीर फडके म्हणजेच ‘बाबुजी’ हे व्यक्तिमत्व इतके महान होते. जगभरात या व्यक्तिमत्वाची ख्याती पसरली आहे. त्यांची व्यावसायिक कारकीर्द आपल्यापैकी अनेकांना माहित आहे. परंतु या यशामागचा त्यांचा संघर्ष, त्यांचे वैयक्तिक आयुष्य फार कमी जणांना माहित आहे. त्यांची जीवनगाथा आपल्याला या चित्रपटाच्या (New Movie) निमित्ताने अनुभवता येणार आहे. बाबुजी गायक, संगीतकार होतेच, परंतु ते एक सच्चे देशभक्त ही होते. नुकताच हा चित्रपट सरसंघचालक मोहन भागवत यांनी चित्रपटाच्या टीमसोबत पाहिला आणि त्यांनी या चित्रपटाचे भरभरून कौतुक केले.
नक्की वाचा : स्टोइनिसचे शतक ऋतुराजवर पडलं भारी;लखनऊने चेन्नईचा ६ विकेट्सनी उडवला धुव्वा
चित्रपट पाहून बाबूजींचा संगीतामागचा भाव लक्षात आला (Mohan Bhagwat )
चित्रपटाबद्दल सरसंघचालक मोहन भागवत म्हणतात,”बाबुजी म्हणाले होते, कोणतेही गीत गाताना भावना त्या शब्दांसोबत आल्या पाहिजेत. केवळ सूर असून चालत नाही. तेव्हा त्याचे महत्व आम्हाला फारसे समजले नाही. परंतु हा चित्रपट पाहून बाबूजींचा संगीतामागचा भाव लक्षात आला. त्यांची देशभक्ती, त्यांनी सोसलेले कष्ट पाहताना त्यांच्या व्यक्तिमत्वाचा प्रत्यय येतो. ही गाणी ऐकताना पुन्हा त्याच विश्वात गेल्याचा भास होतो. उत्तम लेखन, दिग्दर्शन आणि सर्वोत्कृष्ट कलाकारांची निवड यामुळे हा चित्रपट एका उंचीवर गेला आहे. या चित्रपटाच्या माध्यमातून दिग्दर्शक योगेश देशपांडे यांनी सुवर्णकाळ उभा केला असून महाराष्ट्राच्या तमाम प्रेक्षकांना हा नक्कीच आवडेल, असा हा चित्रपट बनला आहे.”
अवश्य वाचा : अमरावतीत बच्चू कडूंचा पोलिसांसमोर राडा;अमित शहांच्या सभेला विरोध
१ मे रोजी चित्रपट होणार प्रदर्शित (Mohan Bhagwat )
सौरभ गाडगीळ प्रस्तुत रिडिफाईन प्रॉडक्शन्स निर्मित या चित्रपटाचे सौरभ गाडगीळ आणि योगेश देशपांडे निर्माते आहेत. तर चित्रपटाची कथा, पटकथा, संवाद आणि दिग्दर्शन योगेश देशपांडे यांचे आहे. ‘स्वरगंधर्व सुधीर फडके’ या चित्रपटात सुनील बर्वे, मृण्मयी देशपांडे, सागर तळाशीकर, मिलिंद फाटक, आदिश वैद्य, सुखदा खांडकेकर, अपूर्वा मोडक, अविनाश नारकर, शरद पोंक्षे, उदय सबनीस, चिन्मय पटवर्धन, निखिल राऊत, विभावरी देशपांडे, धीरेश जोशी, परितोष प्रधान यांच्या प्रमुख भूमिका आहेत. चित्रपट येत्या १ मे रोजी प्रेक्षकांच्या भेटीला येणार आहे.