नगर: पुणे-नाशिक महामार्ग यावरील कऱ्हे घाटात (Karhe Ghat Accident) गुरुवारी सकाळी एक भीषण अपघात झाला. मात्र, या अपघाताचा तपास करताना पोलिसांच्या (Sangamner Taluka Police) हाती अत्यंत धक्कादायक माहिती लागली आहे. दरीत (ravine) कोसळलेल्या एका आलिशान कारमधून तब्बल ८ लाख ४० हजार १३६ रुपयांचा प्रतिबंधित गुटखा आणि सुगंधित तंबाखू जप्त करण्यात आला आहे.(Gutkha Smuggling)
विशेष म्हणजे, हा गुटखा घारगाव येथील बहुचर्चित ‘लव्ह जिहाद’ प्रकरणातील संशयित युसूफ चौगुले याच्यासाठी नेला जात असल्याचा खळबळजनक खुलासा गाडीतील आरोपींनी केला आहे. याप्रकरणी संगमनेर तालुका पोलिसांनी तिघांविरुद्ध गुन्हा दाखल केला असून पुढील तपास वेगाने सुरू केला आहे.
नक्की वाचा : नेवाशात माऊलींच्या मंदिरामागे वाळू चोरी, पोलिसांच्या छाप्यात एकाला अटक
घाटात नियंत्रण सुटले अन् कार दरीत कोसळली
मिळालेल्या सविस्तर माहितीनुसार, गुरुवारी सकाळी ८ वाजण्याच्या सुमारास नाशिककडून संगमनेरच्या दिशेने वेगाने येणारी एक कार कऱ्हे घाटातील धोकादायक वळणावर चालकाचा ताबा सुटल्याने थेट दरीत कोसळली. कार उलटल्याची माहिती मिळताच स्थानिक नागरिकांनी आणि गस्तीवर असलेल्या पोलिसांनी तात्काळ घटनास्थळी धाव घेतली. कारमध्ये दोन तरुण गंभीर जखमी अवस्थेत अडकले होते. पोलिसांनी स्थानिक नागरिकांच्या मदतीने दोन्ही जखमींना तातडीने कारबाहेर काढून उपचारासाठी रुग्णवाहिकेतून जवळच्या रुग्णालयात दाखल केले.
क्रेनने गाडी काढताच उघड झाले गुटख्याचे रॅकेट
अपघातग्रस्त कार दरीतून बाहेर काढण्यासाठी पोलिसांनी तात्काळ क्रेन पाचारण केली. क्रेनच्या साहाय्याने कार वर काढल्यानंतर पोलिसांना गाडीच्या मागील बाजूस संशयास्पद गोण्या आढळून आल्या. पोलीस निरीक्षक प्रवीण साळुंखे यांच्या मार्गदर्शनाखाली पोलीस उपनिरीक्षक महेश शिंदे, पोलीस हवालदार बाबासाहेब शिरसाठ आणि होमगार्ड मच्छिंद्र गवान्डे यांनी गाडीची सखोल झडती घेतली. यावेळी गाडीत महाराष्ट्र शासनाने प्रतिबंधित केलेला गुटखा आणि सुगंधित तंबाखू मोठ्या प्रमाणावर लपवून ठेवल्याचे उघड झाले. पोलिसांनी ८ लाख ४० हजार १३६ रुपये किमतीचा गुटखा आणि ५ लाख रुपये किमतीची इनोव्हा कार असा एकूण १३ लाख ४० हजार १३६ रुपयांचा मुद्देमाल जप्त केला.
🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a
लव्ह जिहादच्या मुख्य संशयिताचे कनेक्शन (Gutkha Smuggling)
या अपघाताला खरा तपासात्मक वळण मिळाले ते आरोपींच्या चौकशीनंतर. अपघातात जखमी झालेल्या सिकंदर रफिक शेख आणि अरमान निजाम शेख (दोघे रा. जांबुत, साकूर) यांची पोलिसांनी कसून चौकशी केली. या चौकशीत त्यांनी हा गुटखा घारगाव येथील ‘लव्ह जिहाद’ प्रकरणातील मुख्य संशयित आरोपी युसूफ चौगुले याच्या सांगण्यावरून आणि त्याच्यासाठीच वाहतूक करत असल्याची कबुली दिली. युसूफ चौगुले हा सध्या एका गंभीर गुन्ह्यात जामिनावर बाहेर असून, तो पडद्यामागून गुटखा तस्करीचे मोठे रॅकेट चालवत असल्याचे यावरून स्पष्ट झाले.
जिल्ह्यात खळबळ; पोलिसांचा तपास सुरू (Gutkha Smuggling)
पोलीस हवालदार बाबासाहेब शिरसाठ यांनी दिलेल्या फिर्यादीवरून संगमनेर तालुका पोलीस ठाण्यात सिकंदर रफिक शेख, अरमान निजाम शेख आणि मुख्य सूत्रधार युसूफ चौगुले या तिघांविरुद्ध अन्न सुरक्षा व मानके कायद्यान्वये आणि विविध कलमांखाली गुन्हा दाखल करण्यात आला आहे. जामिनावर बाहेर असलेला लव्ह जिहादचा मुख्य सूत्रधार आता थेट गुटखा तस्करीच्या बेकायदेशीर व्यवसायात सक्रिय आढळल्याने अहमदनगर जिल्ह्यात प्रचंड खळबळ उडाली आहे. या आंतरजिल्हा तस्करीच्या रॅकेटमध्ये आणखी कोणाकोणाचा समावेश आहे, तसेच युसूफ चौगुलेला स्थानिक पातळीवर कोणाचे राजकीय किंवा इतर पाठबळ मिळत आहे का, याचा सखोल तपास संगमनेर पोलीस करत आहेत.
