Mula Cooperative Sugar Factory : नेवासा : मुळा सहकारी साखर कारखान्याच्या (Mula Cooperative Sugar Factory) संचालक मंडळ निवडणुकीत माजी मंत्री शंकरराव गडाख (Shankarao Gadakh) यांच्या गटाने पुन्हा एकदा आपले निर्विवाद वर्चस्व सिद्ध केले आहे. गुरुवार (दि. १८) रोजी उमेदवारी अर्ज माघारीनंतर गडाख गटाच्या १८ जागा बिनविरोध निवडून आल्या असून, आता केवळ करजगाव गटातील दोन जागा आणि महिला प्रतिनिधीची एक जागा यासाठीच निवडणूक (Election) होणार आहे.
नक्की वाचा : पोलीस भरतीच्या तयारीतील तरुणीवर अत्याचार; अश्लील फोटो व्हायरल करण्याची धमकी
विरोधकांवर केवळ तीन जागांसाठी निवडणूक लढविण्याची नामुष्की
निवडणूक जाहीर झाल्यानंतर सोशल मीडियावर गडाख विरोधी गटाकडून सर्व जागांवर लढत दिली जाणार असल्याचा दावा करण्यात आला होता. मात्र प्रत्यक्षात विरोधकांना सर्व जागांसाठी उमेदवार उभे करता आले नाहीत. परिणामी २१ पैकी १८ जागांवर बिनविरोध निवड झाल्याने विरोधी पॅनलवर केवळ तीन जागांसाठी निवडणूक लढविण्याची नामुष्की ओढवली आहे. बिनविरोध निवड झालेल्या उमेदवारांमध्ये सोनई गटातून वसंत चिमा कुसळकर, छाया भास्कर भुसारी व दिनकर अंबादास घावटे यांचा समावेश आहे. घोडेगाव गटातून लक्ष्मण तुळशीराम पांढरे, एकनाथ मारुती जगताप व दत्तात्रय भानुदास बऱ्हाटे, तर खरवंडी गटातून बापूसाहेब शंकर शेटे, भाऊसाहेब निवृत्ती मोटे व सोपान विठ्ठल विरकर हे बिनविरोध निवडून आले आहेत.
🪀 अहिल्यानगर जिल्ह्यातील अपडेट्स मिळविण्यासाठी क्लिक करा
📲 https://chat.whatsapp.com/GuIoV5EQN6PEvBPT69TR0a
बिनविरोध निवडून आलेले संचालक (Mula Cooperative Sugar Factory)
नेवासा गटातून बाळासाहेब पुंजाजी भणगे व त्रिंबक काशिनाथ सुकाळकर, तर प्रवरासंगम गटातून बाळासाहेब दादा पाटील व पांडुरंग श्रीरंग निपुंगे यांची निवड झाली आहे. सहकारी संस्था मतदारसंघातून शंकरराव यशवंतराव गडाख, अनुसूचित जाती-जमाती मतदारसंघातून शंकर पंढरीनाथ कदम, इतर मागासवर्गीय मतदारसंघातून भाऊसाहेब हरिभाऊ भालके आणि विमुक्त जाती-भटक्या जमाती विशेष मागास प्रवर्गातून बाळासाहेब भाऊलाल परदेशी हे बिनविरोध संचालक झाले आहेत.
गडाख यांची कारखान्यावर असलेली मजबूत पकड पुन्हा एकदा अधोरेखित
दरम्यान, करजगाव गटात गडाख गटाचे ज्ञानेश्वर रामराव दरंदले व चंद्रकांत भानुदास टेमक यांच्याविरोधात किरण जाधव, नारायण डौले तसेच अपक्ष उमेदवार गोरक्षनाथ जाधव रिंगणात आहेत. महिला प्रतिनिधी मतदारसंघात गडाख गटाच्या कमल चांगदेव दहिफळे व विमल नारायण सोनवणे यांच्याविरोधात मीरा दिवटे यांनी उमेदवारी कायम ठेवली आहे. १८ जागांवर बिनविरोध निवड झाल्यामुळे नेवासा तालुक्यातील सहकार क्षेत्रावर माजी मंत्री शंकरराव गडाख यांची मजबूत पकड पुन्हा एकदा अधोरेखित झाली आहे.
